ҚТЖ Қытай бағытындағы жолдардың құрылысын мерзімінен бұрын аяқтайды
Қазақстанда экспорт пен транзиттің негізгі бағыттары бойынша теміржол инфрақұрылымын кеңейту жүргізілуде. Атап айтқанда, Достық – Мойынты учаскесінде екінші жолдардың құрылысы кестеден озып келеді. Шекараның осы учаскесінде өткізу қабілетін арттыруға мүмкіндік беретін жол 2025 жылы іске қосылатын болады. Бұл туралы бүгін Үкімет отырысында ҚТЖ ҰК басқарма төрағасы Нұрлан Сауранбаев мәлімдеді.
Оның мәліметінше, бүгінде аталған учаскеде 836 шақырымнан 700 шақырымнан астам жол төселген.
«Уәде етілгендей, Достық – Мойынты учаскесіндегі құрылыс 2025 жылдың екінші жартыжылдығында аяқталады: жобалық мерзімнен екі жыл бұрын. Бұл ретте келесі жылдан бастап біз жаңа жобалардың құрылысын бастауға дайынбыз. Дайындық жұмыстары басталды», - деді Нұрлан Сауранбаев.
Ол сондай-ақ биыл Орталық Азия бағытындағы өткізу пункттерін кеңейту мәселесі толығымен шешілгенін атап өтті. Сарыағаш бекетінде Өзбекстанмен тәулік сайын алмасу тәулігіне 24-тен 36 пойызға дейін ұлғайтылды. Бұл ретте түйісу пункттерін жаңғырту жөніндегі жол картасын іске асыру басталды.
Сонымен қатар локомотив паркін жаңарту бойынша жұмыстар жүргізілді. ҚТЖ басшысы мәлімдегендей, бүгінде локомотивтердің жетіспеушілігі мәселесі жойылды. Сондай-ақ, жүк тасымалы нарығы вагон паркімен қамтамасыз етілген.
«Қазақстан ірі экономикалық орталықтар – Қытай, Еуропа, Ресей, Үндістан және араб елдерінің арасында стратегиялық орынға ие. Әрбір негізгі бағытта көлік-логистикалық оператор бекітілген. Қабылданған шешімдердің арқасында транзиттік инфрақұрылымды озыңқы дамыту бойынша жүк ағыны жыл сайын артып келеді», - деп атап өтті Нұрлан Сауранбаев.
ҚТЖ деректері бойынша, 2024 жылдың 10 айында ҚР-да тиеу көлемі 1,4%-ға өсіп, 210 млн тоннаға жетті. Контейнерлік транзит 7,5%-ға ұлғайып, 1 млн 155 мың ЖФЭ-ден асты. Елімізде транзиттік әлеуеттің өсуін ескере отырып, 2029 жылға дейін 5 мың км темір жол салып, 11 мың км-ді жөндеу жоспарлануда.