Қазақстандық бидай желімшесі АҚШ-тың жаңа баж салығына түседі
Бидай желімшесі АҚШ енгізген 27% мөлшеріндегі баж салығы қолданылатын қазақстандық экспорттық өнімдердің бірі болады. Бұл ретте АҚШ-қа қазақстандық экспорттың 92%-ы қосымша тарифтердің қолданысына жатпайды, өйткені бұл тауарлар ерекшеліктер тізбесіне енгізілген. Бұл туралы ҚР Сауда және интеграция министрлігінің мәлімдемесінде айтылған.
«Экспорты 2024 жылы 95,2 млн долларды құраған жекелеген тауарлар топтарына қосымша баж салығы қолданылады. Олардың ішінде фосфор (2024 жылы экспорт 15,9 млн долларды құрады), ферросилиций (12,7 млн доллар), линзалар (4,1 млн доллар), бидай желімшесі (4 млн доллар), аммоний нитраты (2,4 млн доллар) бар. Енгізілген тарифтік шаралар қазақстандық экспорттың АҚШ-қа жалпы көлемінің 4,8%-ына ғана әсер етеді», - деп Сауда министрлігінде хабарлады.
Бұл ретте ведомствода үкімет Қазақстанға қатысты қосымша баждарды қолданбау мүмкіндігі туралы мәселені талқылау үшін американдық тараппен консультациялар өткізуге бастамашылық жасайтынын мәлімдеді.
ҚР Ұлттық статистика бюросының деректері бойынша, 2024 жылы Қазақстан мен АҚШ-тың тауар айналымы 4.2 млрд долларды құрады, 2023 жылға қарай 4%-ға ұлғайды (4,1 млрд доллар). Қазақстаннан экспорт 30,6%-ға өсіп, 2 млрд долларды құрады, АҚШ-тан импорт 2,2 млрд долларды құрады. АҚШ-қа қазақстандық экспорттың негізін шикі мұнай, уран, күміс, ферроқорытпалар және басқалар құрайды. Бұл тауарлар жеткізілімдердің 92% құрайды және олар АҚШ президентінің «Тауарлар саудасында АҚШ-тың айтарлықтай және тұрақты тапшылығына әкелетін сауда тәжірибелерін жою үшін өзара тарифтер арқылы импортты реттеу туралы» жарлығымен қарастырылған ерекшеліктер тізіміне енгізілген.
Естеріңізге сала кетейік, Қазақстанда астықты терең өңдеу бойынша үш зауыт іске қосылады. Әзірге бұл шығарылымды BioOperations компаниясы жүзеге асыруда.