Ұлттық банк тамыз айында азық-түлік бағасының төмендегені туралы хабарлады

Ұлттық банктің мәліметінше, тамыз айында соңғы екі жылда алғаш рет азық-түлік тауарларының бағасы 0,2% -ға төмендеуі байқалды. Бұл туралы бүгін үкімет отырысында Ұлттық банк басшысы Ерболат Досаев айтты.

«Қазақстандағы тұтынушылық сұраныстың бәсеңдеуі және әлемдік нарықтарда азық-түлік тауарларының бағасының төмендеуі дезинфляциялық әсер етеді. Тамыз айында азық-түлік компонентінің төмендеуіне байланысты жылдық инфляция 7,1% -дан 7% -ға дейін төмендеді. Соңғы 2 жылда алғаш рет азық-түлік тауарлары тобында ай сайынғы 0,2% дефляция байқалды», - деді Е.Досаев.

Оның айтуынша, жемістер мен көкөністер бағасының маусымдық төмендеуімен қатар тамызда ет өнімдері, нан-тоқаш өнімдері мен жарма, сондай-ақ жұмыртқа бағаларының өсуінің айтарлықтай баяулауы байқалды.

Нәтижесінде азық-түлік тауарларының жылдық өсімі 2020 жылғы шілдедегі 11,3% -бен салыстырғанда  10,9%-ға дейін баяулады.