eGov.kz арқылы жер қызметтері бойынша жаңа сервистер іске қосылды

2026 жылғы қаңтардан бастап eGov.kz порталында жер учаскесін жалға алу мерзімін ұзарту, жер учаскесін жеке меншікке біржолғы немесе бөліп-бөліп сату, сондай-ақ жер учаскесінің нысаналы мақсатын өзгертуге шешім беру жөніндегі қызметтер қолжетімді болды. Бұл туралы Жер ресурстарын басқару комитетінің баспасөз қызметі хабарлады.

«Жаңа сервистер мемлекеттік қызметтерді алудың ыңғайлылығын арттыруға, оларды көрсету мерзімдерін қысқартуға, сондай-ақ жер қатынастары саласындағы рәсімдердің ашықтығын қамтамасыз етуге бағытталған», - деп ведомствода хабарлады.

Жер қатынастары саласындағы мемлекеттік қызметтерді одан әрі жетілдіру және автоматтандыру жөніндегі жұмыс жалғастырылатыны атап өтілді.