АШМ тамақ өнімдерін өндіруде мемлекеттік қолдау жоспарын жасады

Қазақстанның Ауыл шаруашылығы министрлігі отандық нарықты азық-түлік өнімдерімен қамтамасыз етуге арналған 2021-2023 жылдық жоспарының жобасын дайындады. Аталған құжат бойынша құс етін, шұжықтар мен сүт өнімдерін, алма, қант және балық өндірісін қолдау шаралары қарастырылады.

Жоспарда құс өсіруде қолданылатын азықтық дақылдарды өсіру үшін ауылшаруашылық жерлерін беру қарастырылған. Бұл жұмыс келіп түскен өтінімдер бойынша тұрақты түрде жүргізілетін болады. Құс етін өндіруге арналған инвестициялық жобаларды іске асыру үшін әкімдіктер жер учаскелерін де бөледі, сонымен бірге «Бизнестің жол картасы-2025» аясында құс фабрикаларына инженерлік инфрақұрылым жүргізілетін болады.

Тақырыпқа байланысты оқу: Қазақстан 2 жылдан кейін халықты сүт және ет өнімдерімен толықтай қамтамасыз ететін болады

Сондай-ақ, елдегі сүт фермаларына жемге арналған дақылдарды өсіруге арнайы жер учаскелері бөлінеді. Сонымен бірге, сүт фермалары маңызды тізімге кіріп, сумен жабдықтау жүйелерінен су берілуде субсидиялау ережелері бойынша қаражат бөлінетін болады.

Сондай-ақ, Алматы,Жамбыл, Қызылорда, Түркістан облыстары және Шымкент қаласында 6,7 мың гектар алқапта алма бақтарын өсіру жоспарлануда.Аталған жобалар бюджеттен тыс қаражат есебінен қаржыландырылады, барлығы 140 млрд 70 млн теңге жұмсау жоспарланған. Сонымен қатар, көшет өсірілетін питомниктер салынатын болады.

Үш жыл ішінде бау-бақша салуға 15 мың га суармалы жер бөлінеді: Алматы облысында 5,2 мың га, Жамбылда 3,4 мың га, Түркістанда 6 мың га, Қызылорда облысында 0,4 мың га.

Тақырыпқа байланысты оқу: Göknur Gıda ҚР-да жеміс-жидектерді өндіруге $92 млн қаражат салады

Балық өсіру саласын дамыту үшін су қоймаларын беру байқау арқылы өткізіліп, «Аквамәдениет туралы» заң жобасы әзірленеді. Үш жыл бойы балық және балық өнімдерінің қадағалануын қамтамасыз ететін ақпараттық жүйені құруға және енгізуге 180 млн.тенге жұмсалады.

Қант өндірісін жолға қою мақсатында әкімдіктердің қаулысымен қант қызылшасын егуге қосымша 150 мың га суармалы жер бөлініп, суару жүйелерін салу үшін ауылшаруашылық жерлерін алуда оларға жағдай жасалады. Алматы, Жамбыл және Павлодар облыстарында қант қызылшасын өсіру, жинау және тасымалдау бойынша қызмет көрсететін және сатып алатын орталық салу жоспарлануда.

Сонымен бірге, жаңа қант зауытын іске қосу үшін «Тараз химиялық паркіне» инфрақұрылым жүргізіледі, сонымен қатар Ақсу қант зауытына газ жүргізу мәселесі де қарастырылуда. 2023 жылы қант өндіретін кәсіпорынды құруға арналған инвестициялық субсидия мөлшерлемесі 50% дейін ұлғайтылады.