Үкімет дизель отыны мен газдың бағасын белгіледі

Қазақстан Үкіметі Президенттің тапсырмасы бойынша сұйытылған мұнай газын, бензин мен дизель отынын бөлшек саудада өткізудің шекті бағаларын белгіледі. Бағалар 180 күн бойы жарамды болады.

Дизель отынын бөлшек саудада өткізуге шекті бағалар (жазғы, маусымаралық) ҚҚС-ты ескере отырып, өңірге байланысты белгіленді:

• Ақмола, Ақтөбе, Шығыс Қазақстан, Батыс Қазақстан, Қостанай, Солтүстік Қазақстан облыстарында - литріне 260 теңге;
• Нұр-Сұлтан, Алматы, Шымкент қалаларында, Алматы, Атырау, Жамбыл, Қарағанды, Қызылорда, Павлодар, Түркістан облыстарында – литріне 230 теңге.

ЖЖМ станцияларында жанармай құю үшін сұйытылған мұнай газын бөлшек саудада өткізудің шекті бағасы:

• Ақтөбе, Атырау, Маңғыстау облыстарында - литріне 50 теңге (шалғай аудандарда – 200 км-ден жоғары - литріне 55 теңге);
• Шымкентте, Шығыс Қазақстан, Жамбыл, Батыс Қазақстан, Қызылорда және Түркістан облыстарында - литріне 60 теңге (шалғай аудандарда – 200 км-ден астам - литріне 65 теңге);
• Алматыда - литріне 65 теңге;
• Нұр-Сұлтан, Ақмола, Алматы, Қостанай, Қарағанды, Павлодар, Солтүстік Қазақстан облыстарында - литріне 70 теңге (шалғай аудандарда – 200 км-ден астам – литріне 75 теңге).

Бұл ретте сұйытылған мұнай газын электрондық сауда алаңы арқылы өткізуге толық көшу бір жылға ауыстырылды.

Бұдан басқа, қосылған құн салығын ескере отырып, бензинді бөлшек саудада өткізудің келесі шекті бағалары белгіленді:

• АИ-80 маркасы – литріне 89 теңге;
• АИ-92 маркасы - литріне 182 теңге;
• АИ-93 маркасы - литріне 182 теңге;
• АИ-95 маркасы – литріне 215 теңге.

Әлеуметтік маңызы бар азық-түлік тауарларының бағасын тұрақтандыру үшін ірі қара және ұсақ малды – 6 айға, картоп пен сәбізді -3 айға экспорттауға тыйым салынды.

Сондай-ақ, Үкіметтің шешімімен жақын арада реттелетін коммуналдық қызметтер: сумен жабдықтау, су бұру, жылумен жабдықтау, газбен жабдықтау және электрмен жабдықтау тарифтерін арттыруға 180 күн мерзімге мораторий енгізілетін болады.

Естеріңізге сала кетейік: осы жылдан бастап сұйытылған мұнай газын сату электрондық сауда-саттыққа ауыстырылды, бұл оның құнының күрт өсуіне әкелді. Алдымен Маңғыстау облысында, содан кейін басқа өңірлерде бағаны төмендетуді талап ететін бірқатар наразылық акциялары өтті. Қысқа уақыт ішінде митингілер тәртіпсіздіктер мен қарулы қақтығыстарға ұласты, оларды ҚР Президенті Қасым-Жомарт Тоқаев террористік шабуылдар деп атады. ҚР-да 5-19 қаңтар аралығында төтенше жағдай енгізілді.