Қазақстандықтарға ТЖ кезінде азық-түлік сатып алу үшін 5,3 млрд теңге бөлінді

Сәуірде төтенше жағдай кезінде азық-түлік өнімдерін сатып алу үшін қазақстандықтарға Президенттің тапсырмасы бойынша 5,3 миллиард теңге аударылды. Бұл туралы Еңбек және халықты әлеуметтік қорғау министрлігінің баспасөз қызметі хабарлады.

Ведомствоның мәліметінше, 960 мың қазақстандық жалпы сомасы 5,3 млрд. теңгеге азық-түлік жиынтығы үшін төлемдер алды. Наурызда 266 мың адам 1,5 млрд. теңге көлемінде төлем алды.

Азық сатып алу үшін Қазақстан Республикасында төлемдер келесідей азаматтарға  беріледі:

•  атаулы әлеуметтік көмек алушы, оның ішінде көп балалы отбасының 6 жастан 18 жасқа дейінгі балалары;
• медициналық-әлеуметтік мекемелерде тұрақты тұратын мүгедектерден басқа, 16 жасқа дейінгі мүгедек балалар;
• медициналық, әлеуметтік мекемелерде тұрақты тұратын мүгедектерден басқа, барлық жастағы I, II, III топтағы мүгедектер;
• мүгедек баланы тәрбиелеп отырған тұлғалар;
• жергілікті жұмыспен қамту агенттігінде тіркелген жұмыссыз азаматтар.

 Баспасөз қызметі хабарлағандай аталған көмекті алушылардың тізімдерін жергілікті атқарушы органдар құрастырады.