Петропавлда май экстракциялау зауыты іске қосылды

Петропавлда «Масло-Дел» ЖШС-ның жаңа май экстракциялау зауыты іске қосылды, деп СҚО әкімдігінің баспасөз қызметі  хабарлады.

Жобаға 34 млрд теңге салынды, толық қуатына шыққан кезде 220 жаңа жұмыс орны құрылады. Бюджетке 3,2 млрд теңге салық жіберіледі. Жаңа кәсіпорын жылына 400 мың тоннаға дейін майлы дақылдарды өңдей алады. Өндіріс толығымен автоматтандырылған және қалдықсыз, заманауи еуропалық қондырғылармен жабдықталған.

«Өнімдер - күнбағыс, рапс және зығыр майы, сондай-ақ жоғары ақуызды жем қоспалары - күнжара мен жом. Қазірдің өзінде 10 мың тонна тазартылмаған күнбағыс майы өндірілді», - деп атап өтті әкімдікте.

Көктемде экстракция желісін енгізу жоспарлануда, ал жыл соңына дейін - тамақ өнеркәсібінде сұранысқа ие лецитин өндіру үшін өсімдік майын терең өңдеу цехын іске қосу жоспарлануда.

«Кәсіпорын шикізатты жергілікті диқандардан сатып алады, бұл өңірдің жоғары әлеуетін көрсетеді. Биыл әртараптандыру аясында майлы дақылдардың егіс алқабы 85 мың гектарға ұлғайтылып, 760 мың гектарға дейін жетті», - деп СҚО әкімі Гауез Нұрмұхамбетов жаңа кәсіпорынды аралау барысында атап өтті.

Жаңа май экстракциясы зауытының арқасында аймақ өз өнімін толық өңдеуді қамтамасыз етеді. Өткен жылы СҚО-да 780 мың тонна майлы дақылдар жиналды, бұл ретте қайта өңдеу кәсіпорындарының жиынтық қуаты қазір жылына 813 мың тоннаны құрайды.