Қазақстан мен Өзбекстан шекарасындағы Өнеркәсіптік кооперация орталығы 2027 жылы іске қосылады

Қазақстан мен Өзбекстан шекарасында «Орталық Азия» Халықаралық өнеркәсіптік кооперация орталығының (ХӨКО) құрылысы ағымдағы жылы басталады, ал оның толық іске қосылуы – 2027 жылдың бірінші жартысында жоспарланған. Қазақстан тарапынан конкурстық іріктеу қорытындысы бойынша инвестор ретінде «TCL gr.» ЖШС анықталды. Бұл туралы ҚР Сауда және интеграция министрлігінің баспасөз қызметі хабарлады. 

ХӨКО шекара маңындағы аумақта Өзбекстан тарапынан «Гүлистан» және Қазақстан тарапынан «Атамекен» халықаралық өткізу пункттері ауданында салынатын болады.

Өткен аптада Қазақстан мен Өзбекстан сауда министрлерінің орынбасарлары ХӨКО құруды жеделдету жөніндегі жұмыс тобының екінші отырысын өткізді. Инвестор Түркістан облысының әкімдігімен бірлесіп орталықты дамыту тұжырымдамасын әзірледі, құрылыс басталар алдында дайындық жұмыстары жүргізілуде.

ХӨКО оператор-компаниясының функцияларына ҚР Өнеркәсіп және құрылыс министрлігімен және Түркістан облысының әкімдігімен келісім бойынша орталық аумағында жобаларды іріктеу және орналастыру кіреді. Сондай-ақ, инвестор индустриялық аймақтың қатысушылары мен резиденттері үшін сервистік қызметтер көрсететін болады, орталықты дамыту және ілгерілету бойынша іс-шаралар жүргізетін болады.

Кеңес қорытындысы бойынша Қазақстан мен Өзбекстанның іргелес облыстары әкімдіктерінің орынбасарлары «Орталық Азия» өнеркәсіптік кооперация орталығын жедел құру жөніндегі Жол картасына қол қойды. Сондай-ақ «TCL gr.» ЖШС мен Global Textile өзбек компаниясы ынтымақтастық туралы меморандум жасасты. Бұл дайын тоқыма өнімдерін өндіруге бағытталған ХӨКО-ның алғашқы инвестициялық жобасы.

ҚР сауда және интеграция вице-министрі Қайрат Төребаев атап өткендей, өнеркәсіптік кооперация орталығын техникалық іске қосу 2026 жылдың 4 тоқсанына, ресми ашылуы 2027 жылдың бірінші жартыжылдығына жоспарланған. ҚР Сауда және интеграция министрлігі жобаны іске асыру кезеңдерін оның аяқталуына дейін толық бақылайтын болады.

ХӨКО құру шекара маңындағы елдермен сауда-экономикалық қатынастардың дамуына оң әсер етеді, өндірушілер мен кәсіпкерлер арасындағы іскерлік байланыстарды жандандырады және Қазақстан мен Өзбекстан арасындағы тауар айналымының өсуін ынталандырады, деп атап өтті Сауда министрлігінде.