Қытай астық импортын 30%-ға арттырды

2024 жылдың алғашқы екі айында Қытайда астық импортының тұрақты өсуі байқалды. ҚХР Ауыл шаруашылығы және ауылдық істер министрлігінің мәліметі бойынша, қаңтар-ақпан айларында ел 13,36 млн тоннадан астам астық импорттаған, бұл өткен жылмен салыстырғанда 29,57%-ға көп. Бұл туралы «Синьхуа» хабарлады.

Екі айдың ішінде астық импорты құны бойынша шамамен 4,03 млрд долларды құрады, бұл жылдық есептегенде 1,38%-ға артық.

Ресми мәліметтерге сәйкес, ақпан айында Қытайға астық импорты шамамен 6,76 млн тоннаны құрап, 2023 жылдың ақпанымен салыстырғанда 20,84%-ға өсті.

Естеріңізге сала кетейік, 2023 жылы Қазақстан Қытайға 2,2 млн тоннадан астам астық жүктерін жеткізді, бұл өткен жылмен салыстырғанда 3 есе көп. Бұл ретте сарапшылар Алашанькоу және Қорғас бекеттерінде жылына 4 млн тоннадан астам астық экспорттау мүмкіндігін бағалайды.