Ресей қант экспортына уақытша тыйым салды

Ресейде қамыс немесе қызылша қанты мен химиялық таза сахарозаны экспорттауға уақытша тыйым салынады. Шектеу 2024 жылдың 31 тамызына дейін қолданылады. Тиісті қаулыны Үкімет қабылдады.

Қаулымен ЕАЭО елдеріне белгілі бір көлемде қант жеткізуге ерекше жағдайлар қарастырылған. Қазақстанға осы мерзім ішінде 120 мың тонна қант, Арменияға – 28 мың тонна, Беларуське – 5 мың тонна, Қырғызстанға – 28,5 мың тонна қант жеткізуге болады.

«Шешім ішкі азық-түлік нарығының тұрақтылығын сақтауға бағытталған», - деп хабарлады РФ Үкіметі.

Айта кетейік, Қазақстанда қант импортына өте жоғары тәуелділік сақталуда. Сондықтан 2022 жылы Ресей қант экспортына тыйым салуды енгізген кезде Қазақстанда күрт тапшылық және осы өнімге бағаның бірнеше есе өсуі байқалды. Осыдан кейін ҚР-да қант қызылшасы өндірісін жылына 1800 мың тоннаға дейін ұлғайтуды көздейтін 2022-2026 жылдарға арналған қант саласын дамытудың Кешенді жоспары қабылданды. Ауыл шаруашылығы министрлігінің жоспарлары бойынша 2028 жылға қарай ішкі нарықты отандық шикізаттан өндірілген қантпен қамтамасыз ету 2022 жылмен салыстырғанда 6%-дан 80%-ға дейін артуы тиіс.