Түркістан облысында жауған бұршақ мақта мен қауын алқаптарына зиян келтірді

Бұршақ салдарынан мақта мен қауын дақылдары зиян шеккен Түркістандық диқандар миллиондаған шығынға ұшырады. Бұл туралы ақпаратты «Первый канал Евразия» хабарлады.

Қостақыр ауылының тұрғыны Бақытжан Жылтаев бұршақ ұру себебінен болған шығынды 15 миллион теңгеге бағалады.

«Мен 1 жылға 3 миллион теңге несие алдым, жылқыларымды саттым. Мен таныстарымнан  дизель отыны мен тыңайтқыштарды қарызға алған едім. Қазіргі кезде ауылда жұмыс жоқ, сондықтан біз егін егумен айналысамыз, басқа табыс көзі жоқ. Енді қауынды қайта отырғызу керек. Екі есе шығын кететін болды», — деді ол.

Қостақыр ауылында 30 отбасы тұрады, барлығы ауыл шаруашылығымен айналысады. Ауыл тұрғыны Жанәділ Есполовтың айтуынша, ол 175 гектар жерге егін егіпті.

«Бұршақ бәрін талқандады, бәрін қиратты. Егін егу үшін адамдар несие алып, малын сатады. 50 гектарға отырғызған мақтаға зиян келді. Мемлекет бізге шығындарды қалпына келтіруге көмектеседі деп үміттенеміз. Мүмкін қаражат бөлетін шығар», — деп үміттенеді еңбеккер.

Әзірше облыс әкімдігі өтемақы мәселесін әлі қарастырған жоқ. Сонымен бірге, жергілікті билік фермерлер жыл сайын бұршақ, дауыл немесе қатты жаңбырдан зардап шегетінін айтады.

«Қызылқұм ауылдық округінде 14 фермердің жері зардап шекті. Бәрінде әртүрлі шығындар бар. Біз оларға минералды тыңайтқыштарды жеңілдікпен алуға көмектесеміз. Сонымен қатар  зардап шеккен көшеттердің орнына мақта тұқымын  беру туралы келісімге келдік. Сондай-ақ, шаруалар үшін жеңілдетілген несие беру туралы банктермен сөйлестік», — деді Жетісай ауданы ауыл шаруашылығы департамент басшысы Марат Абуов.

Бұршақ жеміс ағаштарын да қатты соқты. Дәрумендер арқылы оларды өлтірмей құтқарып қалуға  болады. Сондықтан фермерлер жоқ дегенде бір өнімді тез сақтап қалуға асығуда.

Естеріңізге сала кетейік, осы жылдан бастап жаңа заң күшіне енді, соған сәйкес ауыл шаруашылық өнімдерін сақтандыру алдыңғы 15 жылдағыдай міндетті емес, биылдан бастап ерікті болып табылады.