Қазақстанда көкөністер мен жемістер қымбаттады

Қазақстанда инфляция 2023 жылғы мамырда 0,6%, жылдық есепте - 15,9% құрады. Азық-түлік тауарларының бағасы бір айда 0,5% - ға (бір жылда 16,5% - ға) өсті. Бұл туралы ElDala.kz ҚР Ұлттық статистика бюросына сілтеме жасай отырып хабарлайды.

Азық-түлік өнімдерінің арасында бір айдағы бағалар жеміс-көкөніс өнімдеріне өсті. Мамыр айында қырыққабат 23,8%, пияз 9,9%, жүзім 9,6%, сәбіз 8,6%, алма 5,3%, картоп 4% қымбаттады.

Сондай-ақ, бағаның өсуі күрішке – 2,5%, алкогольсіз сусындарға – 1,9%, ауыз сүтке – 1,8%, шайға -1,6% - ға байқалды. Қияр 39,6% – ға, қызанақ 23,7% – ға, тәтті бұрыш 7,6% – ға, қарақұмық жармасы 4% – ға, банан 3,8% - ға арзандады.

Сонымен қатар, мамыр айында бағаның өсуі бензинге – 1,2% – ға, дизель отынына-0,7% - ға байқалды. 

Өңірлердің ішінде ең жоғары айлық инфляция Шымкент қаласында тіркелді – 1% – ға (орташа республикалық деңгейден 0,4 п.т. жоғары), ең төмені - Павлодар облысында 0,1% - ға.

Өңірлер бөлінісінде азық-түлік тауарларының бағасы Ұлытау облысында ең көп 1,4% - ға өсті.

2023 жылғы мамырда инфляция жылдық есепте 15,9% құрады. Азық-түлік тауарларының бағасы 16,5% - ға өсті.

2023 жылғы мамырда 2022 жылғы мамырмен салыстырғанда қантсыз концентрацияланған сүт 46,6% – ға, күріш 44,9%-ға, тазартылған қант 42,7% – ға қымбаттады. Керісінше, жыл сайын қырыққабат пен сәбіз әрқайсысы 19,1%, картоп 16,8%, сарымсақ 8,4%, қызылша 7,1% арзандады.