Маңғыстау облысында ауданы 6 га жылыжай кешені іске қосылады

Alatau Green Production ЖШС Маңғыстау облысында жалпы ауданы 6 гектар жылыжай кешенін салады. Жоба жыл бойы көкөніс өсіруді және сақтау инфрақұрылымын құруды көздейді, бұл тұрғындарды жаңа өніммен қамтамасыз етуге, импортқа тәуелділікті азайтуға және азық-түлік бағасын тұрақтандыруға мүмкіндік береді, деп өңірлік әкімдікте хабарлады.

Жылыжайда қызанақ, қияр, бұрыш, баклажан, шалғам және жапырақ салатын өсіру жоспарлануда.

Сонымен қатар, өнімді ұзақ уақыт сақтауға арналған көкөніс қоймасын, сондай-ақ жемістерді қысқа мерзімді сақтауға арналған қойманы салу жоспарлануда.

Маңғыстау облысының әкімі Нұрдәулет Қилыбай кәсіпорын құрылтайшыларымен кездесуде жобаның өңір үшін стратегиялық маңыздылығын атап өтті.

«Жобаға заң аясында тиісті қолдау көрсетуге дайынбыз. Бұл  өңірдің агроөнеркәсіптік әлеуетін арттыруға бағытталған маңызды қадам. Бірлескен жұмыстың нәтижесінде жобаны сапалы әрі тиімді жүзеге асыруға толық мүмкіндік бар», – деді Нұрдәулет Қилыбай.