Алматы облысында жеміс-көкөніс кластеріне 16,5 млрд теңге инвестиция салынады
Алматы облысында агроөнеркәсіптік кластер құру бойынша құны 16,5 млрд теңге болатын Qazaq Global Food JV компаниясының жобасы іске асырылуда. Оның құрамына алма концентраты мен томат пастасын өндіретін зауыт, қуаттылығы жылына 1 мың тонна қайта өңдеу қалдықтарынан пектин шығаратын кәсіпорын, сондай-ақ сұрыптау және орау желілері бар сыйымдылығы 30 мың тонна заманауи жеміс қоймасы кіреді. Бұл туралы ҚР Ауыл шаруашылығы министрлігінің баспасөз қызметі хабарлады.
Жобаны іске асыру туралы ауыл шаруашылығы министрі Айдарбек Сапаровқа өңірге сапар барысында баяндалды. Компания басшылығының ақпараты бойынша, 2026-2027 жылдары объектілерді кезең-кезеңімен пайдалануға беру жыл сайын 70 мың тоннаға дейін ауыл шаруашылығы шикізатын қайта өңдеуге және экспорттық түсімді шамамен 58,8 млн долларға қамтамасыз етуге мүмкіндік береді. Жоба мемлекет басшысының терең өңдеу өнімдерінің үлесін ұлғайту және экспортқа бағдарланған өндірістерді дамыту жөніндегі алға қойған міндетіне сәйкес келеді.
Министр сондай-ақ 2024 жылдан бері іске асырылып келе жатқан алманың әйгілі апорт сортын жандандыру жөніндегі жобаның іске асырылу барысын тексерді. Жоба аясында жоғары сапалы отырғызу материалы өсірілуде. 2025 жылдың ақпан айында 0,5 га алаңда қысқы отырғызу жүргізілді, ал бүгінгі күні 2 080 көшет өсірілді. 2027 жылға қарай апорт бақтарының аумағын 110 гектарға дейін ұлғайту жоспарлануда.
Сондай-ақ, Алматы облысында «Баймене» ЖШС 2016 жылдан бастап су үнемдеу технологияларын қолдана отырып, қарқынды алма бақтарын табысты дамытып келеді. Бақшаның ауданы 110 гектарға жетті, ал өнімділігі бір гектардан 45-50 тоннаны құрайды. Кәсіпорында қуаттылығы сағатына 5 тонна өнімді құрайтын жеміс өңдеу зауыты пайдалануға берілді. Жобаға салынған инвестициялардың жалпы көлемі 6,8 млрд теңгені құрады.
Ауыл шаруашылығы министрінің қатысуымен өткен жиында айтылғандай, жан-жақты мемлекеттік қолдаудың арқасында қазақстандық бау-бақшасы сапалы жаңа деңгейге көтеріліп, жыл сайынғы көшет өнімі шамамен 300 мың данаға жетті.
Ауыл шаруашылығы министрлігі өз кезегінде инвестициялық жобаларды іске асыру, ауыл шаруашылығы өнімдерін терең өңдеуді дамыту және агросекторға заманауи технологияларды енгізу үшін қолайлы жағдайлар жасау жөніндегі жүйелі жұмысты жалғастырады.