Қазақстан 11,2 млн тонна бидай жинайды

Қазақстанда жалпы астық жинау 15,3 млн тонна көлемінде, оның ішінде бидай - шамамен 11,2 млн тонна көлемінде болжанады. 11 қазандағы жағдай бойынша елімізде 14,9 млн га дәнді дақылдар немесе жоспарланған алаңның 86,2% жиналды. Орташа өнімділігі 9,2 ц/га кезінде 13,6 млн тонна астық бастырылды. Бұл туралы Ауыл шаруашылығы министрлігінің баспасөз қызметі хабарлады.

Ведомствода атап өткендей, елімізде өткен жылғы жоғары сапалы астықтың көлемі - шамамен 3 млн тонна.

"Ауыспалы қалдықтарды ескере отырып, күтілетін жалпы алым Республиканың ішкі қажеттілігін толық қамтамасыз ету үшін және астықтың белгілі бір көлемін экспортқа өткізу үшін жеткілікті", - деді Ауыл шаруашылығы вице-министрі Әбілқайыр Тамабек.

Ауыл шаруашылығы министрлігі ауа-райынан зардап шеккен аграрларға қолдау көрсету үшін Азық-түлік корпорациясының форвардтық сатып алу шеңберінде 3-класты бидай үшін 120 мың теңге/тонна және 4-класты бидай үшін 105 мың теңге мөлшерінде сатып алу бағасын белгілеу ұсынылғанын еске салды.

Тақырып бойынша оқу: Азық-түлік корпорациясы бидайды сатып алу бағасын жариялады

Сонымен қатар, 350 мың тонна көлемінде 4-класты бидай үшін 105 мың теңге, 5-класты бидай үшін 90 мың теңге, класты емес бидай үшін 70 мың теңге бағамен тікелей сатып алуды жүзеге асыру жоспарлануда.

Осы мақсаттар үшін Азық-түлік корпорациясының жарғылық капиталын 31,3 млрд теңге көлемінде толықтыру көзделіп отыр.