Қазақстан Иранға жемдік астық жеткізуді қайта бастайды

Азық-түлік корпорациясы Иранға ауылшаруашылық өнімдерінің негізгі жеткізушісі болып табылатын FREEDOM SKY TRADING FZCO компаниясының өкілдерімен келіссөздер жүргізді. Қорытындысы бойынша тараптар қазақстандық жемдік астықты Иранға жеткізу туралы уағдаласты, деп хабарлады Азық-түлік корпорациясының баспасөз қызметі.

«Кездесу барысында қазақстандық арпа, жемдік бидай мен жүгеріні Иранға су көлігімен де, құрлықпен де жеткізу саласындағы ынтымақтастықты қалпына келтіру туралы уағдаластықтарға қол жеткізілді», - деп хабарлады компания.

Иран қазақстандық астықтың, бидайдың да, арпаның да дәстүрлі өткізу нарығы болып табылады.

Бұған дейін ЕАЭО елдері Иранмен еркін сауда туралы келісім жасасқан болатын. Бұл Қазақстанға 700 мың тоннаға дейін бидай мен 690 мың тонна арпаны бажсыз жеткізуге мүмкіндік береді.