Солтүстік Қазақстанда астық өнімділігі гектардан 17,6 ц құрады

Солтүстік Қазақстан облысында 23 қыркүйекте 2,2 млн га дәнді және бұршақты дақылдар жиналды. 3,9 млн тонна астық бастырылды, орташа өнімділігі гектардан 17,6 ц. Бір жыл бұрын өнімділігі гектардан 10,3 ц құрады, деп хабарлады облыстық ауыл шаруашылығы басқармасы.

Солтүстік Қазақстан облысының аграрийлеріне 4,4 млн гектар алқапта егін жинау қажет, оның 3,3 млн гектарын дәнді және дәнді-бұршақты дақылдар алып жатыр.

Өңірде жалпы сыйымдылығы 3,2 млн тонна болатын 46 элеватор жұмыс істейді. Сонымен қатар, агроқұрылымдарда 3,7 млн тоннаға астық сақтауға арналған сыйымдылықтар бар. Қазіргі уақытта қоймалар 27,7% жүктелген.

Егін жинау басталғаннан бері астық қабылдау кәсіпорындарына 581,6 мың тонна астық түсті, оның ішінде 395,9 мың тонна бидай: 3-сынып – 167,7 мың тонна (45%), 4-сынып – 157 мың тонна (42%).

Егін жинауға өңірдің аграрийлеріне литріне 250 теңге бағамен 59 мың тонна дизель отыны бөлінді, астықты кептіру үшін тағы 20 мың тоннаға жуық бөлінді. Өңірде 332 астық кептіргіш бар, ауыл шаруашылығы басқармасының мәліметінше, бұл өңірде қажетті жұмыстарды жүргізу үшін жеткілікті.

Естеріңізге сала кетейік, жалпы Қазақстан бойынша Ауыл шаруашылығы министрлігі астық өнімін 20 млн тонна көлемінде болжап отыр. 23 қыркүйекте орташа өнімділігі гектардан 14,7 ц болатын 16,7 млн тонна астық бастырылды.