Құрық портындағы астық терминалы 2024 жылы іске қосылады
Құрық теңіз портында биыл түпті тереңдету жұмыстары аяқталып, астық терминалын іске қосу жоспарлануда. Қазіргі уақытта портта логистикалық кластер құру және паром флотын жаңарту жұмыстары жүргізілуде. Бұл туралы Үкіметтің баспасөз қызметі хабарлады.
Ақтау және Құрық теңіз порттарының дамуымен ҚР премьер-министрі Олжас Бектенов танысты. Қазіргі уақытта Құрық порты терминалдық қуаттардың өткізу қабілетін арттыру бойынша жұмыс жүргізуде. Сонымен қатар, жүк номенклатурасын әртараптандыру үшін порт аумағында қуаттылығы жылына 1 млн тоннаға дейін астық сақтауға арналған жаңа терминал салынуда.
«Президенттің Жолдауында Қазақстанға теңіз инфрақұрылымын дамыту бойынша тұтас көзқарас қажет екендігі атап өтілді. Қазіргі тұжырымдамада Құрық порты Land port Quryq сияқты дами алады, онда біз оператор боламыз және барлық жеке терминалдар жүк қорын қамтамасыз етеді. Бүгінгі күні іс-шаралар өткізіліп, біздің портқа жақын орналасқан терминалдармен келісімдер жасалды», — деді «Құрық порты» ЖШС маркетинг секторының бастығы Айтқали Нұрмағамбетов.
Құрық портындағы жүктерді ауыстырып тиеу көлемі жыл басынан бері 1,5 млн тоннадан асты, ал жыл соңына қарай көлемі 2,2 млн тоннаға дейін жеткізілетін болады. Жалпы келешекті жобалық қуаттылығы жылына 6 млн тонна жүкті құрайды. Жыл бойы Құрық теңіз порты автомобиль және теміржол паромдарын қабылдай алады, бұл үшін төрт арнайы айлақ бар.
Өз кезегінде Ақтау теңіз сауда порты Транскаспий халықаралық көлік бағытын дамытуда шешуші рөл атқарады. Оның техникалық жабдықталуы жүктердің кең спектрін өңдеуге мүмкіндік береді. Бүгінгі таңда порттың өткізу қабілеті 11 млн тоннадан асады. Үш мұнай құю және үш құрғақ жүк айлағы, өткізу қабілеті жылына 800 мың тонна ауыл шаруашылығы өнімі бар астық терминалы, сондай-ақ паром кешені жұмыс істейді. Ағымдағы жылдың 8 айында порт арқылы жүктерді ауыстырып тиеу көлемі 3 млн тоннадан асты, негізгі бағыттары – Иран, Түрікменстан, Әзірбайжан, Ресей.