Қазақстанда егін жинау науқанына 38 мың комбайн мен 145 мың трактор пайдаланылды

Елімізде жаппай егін ору науқаны жалғасуда. Өңірдегі ірі шаруа қожалықтарының біріне барған Ауыл шаруашылығы министрі Сапархан Омаров Ақмола облысындағы егін жинау барысымен танысты.

«Егін ору үшін елдің фермерлерінде 145 мың трактор, 75 мың трактор тіркемесі, 38 мың астық жинайтын комбайн, 15 мың орақ, 39 мың жүк машинасы бар», - деп хабарлады Ауыл шаруашылығы министрлігінің баспасөз қызметі.

Бүгінгі күні республикада 3,7 миллион гектардан астам бұршақты және дәнді дақылдар орылды немесе барлық егіс алқабының 23,6 пайызы жиналды, ал өткен жылы 3,1 миллион гектар немесе 20,1 пайыз еді. Орташа өнімділік гектарына 13,1 центнерді құрап, 4,9 миллион тонна астық бастырылды (2019 жылы - 3,7 миллион тонна).

Ауыл шаруашылығы министрлігінің мәліметінше, еңбеккерлерге дер кезінде астық жинау үшін 395 мың тонна арзан жанар-жағармай бөлінді. Энергетика министрлігі тамыз айына мұнай өңдеу зауыттарына- 178 мың теңге/тоннасы немесе 147 теңге/литрі етіп баға белгіледі. Операторлардың шығындарын ескере отырып, фермерлер үшін орташа баға литрі 168 теңгені құрайды (нарықтағы бағадан 10% арзан).

Сапархан Омаров Ақмола облысына жұмыс сапары аясында «Журавлевка-1» ЖШС-на барды. Компанияның негізгі қызметі - дәнді, бұршақ дақылдары, майлы дақылдар, мал азықтық дақылдар мен көкөністерді өсіру.

Кәсіпорын директорының міндетін атқарушының айтуынша, биыл шаруашылықтың егіс алқабы 59 мың гектарды құрады. Бидайға 33,5 мың гектар, арпаға 12 мыңнан сәл артық жер, сұлыға 1362 гектар бөлінді. Күнбағыс 1543 гектарға, зығыр - 3969 гектарға, рапс - 4879 гектарға себілді. Картоп пен көкөністер 110 га, мал азығына арналған дақылдар 1120 га.

«Барлық жұмыс мүмкіндігінше механикаландырылған және оны заманауи кешендер жүзеге асырады. Шаруашылықта жерді минималды және нөлдік деңгейде өңдейді, органикалық және минералды тыңайтқыштар енгізіледі. Тұқым тазалайтын қуатты кешен бар», - деді Темірболат Андаров.

Компанияның меншігінде 20 орақ және 152 комбайн мен трактор бар. Барлық техника егін жинау науқанына толығымен дайын.

Сонымен қатар, ЖШС мал шаруашылығын ойдағыдай дамытуда. Қазіргі уақытта Журавлевка-1-де 260 қой, 259 жылқы және 1547 ірі қара бар, негізінен қазақтың ақбас тұқымы өсіріледі. Мал бағуға арналған 15,7 мың гектар жайылымдық жер бар.

Сондай-ақ, 250 бас сиырға арналған бордақылау алаңы және шағын қасапхана бар.

Компанияда облыстың 600-ден астам тұрғыны жұмыс істейді, орташа айлық жалақы 160 мың теңгені құрайды.