ҚХР компаниясы Қазақстанда қайта өңдеу үшін Азық-түлік корпорациясының астығын сатып алуды жоспарлап отыр

Астықты терең өңдеу кешенін Ақмола облысында қытайлық Dalian Hesheng Holdings және SHIJIXIANGHE Agribusiness Group компанияларының қатысуымен салу жоспарлануда. Қытайлық серіктестер Азық-түлік корпорациясын әлеуетті астық жеткізушілердің бірі ретінде қарастырады. Бұл туралы ҚР Ауыл шаруашылығы министрлігінің баспасөз қызметі хабарлады.

Азық-түлік корпорациясының басқарма төрағасы Асылхан Джувашев пен SHIJIXIANGHE Agribusiness Group басшысы Яо Сан болашақ өңдеу зауыты үшін астықты тұрақты жеткізуді ұйымдастыру саласындағы ынтымақтастық туралы келіссөздер жүргізді.

Бастапқы кезеңде зауыт қуаттылығы одан әрі 3 млн тоннаға дейін ұлғайып, жылына 1 млн тонна бидай өңдейтін болады.

Келіссөздер барысында Азық-түлік корпорациясының басшысы хабарлағандай, мемлекеттік астық операторы қажетті өнім көлемін ұсына отырып, кәсіпорынның тұрақты жүктемесін қамтамасыз етуге дайын.

«Астық егетін өңірде жоғары технологиялық жобаны іске асыру АӨК-ті дамытуды ынталандырады, сондай-ақ қазақстандық аграрийлердің ауыл шаруашылығы өнімдерінің кепілді өткізілуін жолға қоюға көмектеседі», - деп атап өтті Ауыл шаруашылығы министрлігінде.

Қытайлық көпсалалы Dalian Hesheng Holdings компаниясы бидайды өңдеу және ферменттеу саласындағы технологиялық патенттің иегері болып табылады, озық цифрлық технологияларды пайдаланады. Dalian Hesheng Holdings компаниялар тобы басқарма төрағасының орынбасары Ма Хунхан бастаған қытайлық делегацияның өкілдері ҚР премьер-министрі Олжас Бектеновпен кездесіп, жобаның Қазақстан аумағында жүзеге асырылуын талқылады.

​​Естеріңізге сала кетейік, Ақмола облысында бидайды терең өңдеу бойынша тігінен интеграцияланған өнеркәсіптік парк құрылысын 2025 жылдың екінші тоқсанында бастау жоспарлануда. Dalian Hesheng Holdings компаниясы осы өндіріске 1,5 млрд доллар инвестиция салады.