Қазақстан Тәжікстанға астық жеткізуді ұлғайтуды жоспарлап отыр
Қазақстан 2025 жылы Тәжікстанға 1,2 млн тонна бидай жеткізді, бұл соңғы бес жылдағы ең жоғары көрсеткіш болды. Азық-түлік корпорациясы Астанада Тәжікстан үкіметі жанындағы Мемлекеттік материалдық резервтер агенттігінің өкілдерімен келіссөздер жүргізді, олардың барысында тараптар азық-түлік жеткізу саласындағы ынтымақтастықты кеңейтуге келісті. Бұл туралы корпорацияның баспасөз қызметі хабарлады.
Мемлекеттік материалдық резервтер агенттігінің директоры Нурмахмад Ахмадзода Тәжікстан биылғы маусымда 1,3 млн тоннаға дейін астық импорттауды жоспарлап отырғанын хабарлады.
Тараптар Қазақстанның дәстүрлі түрде Тәжікстанға бидай мен ұнның негізгі жеткізушісі болып табылатынын, онда ішкі өндіріс сұраныстың тек 40%-ын ғана қамтитынын атап өтті.
«Біздің ынтымақтастығымыздың маңызы зор, өйткені кез келген мемлекет үшін азық-түлік қауіпсіздігі мәселелері әрқашан бірінші орында. Біз астықты ғана емес, ұнды, күнбағыс майын да жеткізуге мүдделіміз», — деді Нурмахмад Ахмадзода.
Ол сондай-ақ Азық-түлік корпорациясының өкілдерін Душанбеге астық сақтау инфрақұрылымымен танысуға және жаңа элеваторлар мен қайта өңдеу қуаттарын салуға қатысуды қарастыруға шақырды.
Өз кезегінде Азық-түлік корпорациясы басқарма төрағасының бірінші орынбасары Ильдар Исмағұлов ынтымақтастықты кеңейтуге мүдделі екенін білдірді.
«Азық-түлік корпорациясы азық-түлік қауіпсіздігін қамтамасыз етуде агенттікке ұқсас стратегиялық қызметті орындайды. Біздің серіктестігіміз уақыт сынағынан өткен және өзара сенім мен ортақ мақсаттарды түсінуге негізделген. Өз тарапымыздан біз Тәжікстанға икемді жеткізу тетіктерін ұсынуға және астық пен қажетті азық-түліктің тұрақты көлеміне кепілдік беруге дайынбыз», - деп сендірді компания өкілі.
Соңында тараптар астық жеткізуге арналған келісімшартқа қол қоюды пысықтауға келісті.