ЕАЭО Іскерлік кеңесі сүт өнімдерін таңбалауға қарсы

ЕАЭО Іскерлік кеңесі Еуразиялық экономикалық комиссиядан сүт өнімдерін таңбалауды орынсыз деп тануды сұрады. Бұл туралы «Атамекен» ұлттық кәсіпкерлер палатасында хабарлады.

Палата хабарламалары бойынша, ЕАЭО мүше-мемлекеттерінің сүт өнімдерін өндірушілері мен қайта өңдеушілері, Беларусь агроөнеркәсіп одағы, Қазақстанның сүт одағы, Ресей сүт өндірушілерінің ұлттық одағы (Союзмолоко) және Қырғызстанның сүт өнімдерін өндірушілері айтылған таңбалау ісіне алаңдап, шараны орынсыз деп санайды. Мұны ЕЭК-ке, үкіметтерге, сондай-ақ ЕАЭО мүше-мемлекеттер кәсіпкерлерінің ұлттық одақтарына келіп түскен өтініштер растайды.

Бұған дейін ҚР «Атамекен» ҰКП ЕАЭО Іскерлік кеңесін осындай таңбалау мәселесімен ЕЭК-ке жүгінуге шақырған болатын. Аталған үндеуге 7 шілдеде қол қойылып, ЕЭК Алқасының төрағасы Михаил Мясниковичке жолданған болатын.

«Біріншіден, сүт өнімдері тез бұзылады және жалған өнімдер болмайды. Бұл өнімдерді  ветеринарлық сертификаттар және электронды шот-фактуралар арқылы  бақылауға  болады. Сүт өнімдері әлеуметтік маңызы бар және сұранысқа ие тауарлар екендігін  ескеру қажет, қазіргі дағдарыс жағдайында таңбалау үшін шығын кетеді, ал қазіргі қиын кезде бағаны көтеруге болмайды», - деп жазылған хатта.

Қазақстан Сүт одағының алдын-ала есептеулеріне сәйкес, өнімді таңбалау кодтары мен жабдықтардың шығынын есептейтін болсақ, жылдық құны шамамен 4,3 млрд теңгені құрайды (таңбалық кодтың құны 3 теңге).

«Союзмолоко» компаниясының мәліметі бойынша, сүт өнімдерін міндетті түрде таңбалауды енгізу үшін ресейлік сүт өндірушілердің кем дегенде 26 миллиард рубль мөлшеріндегі бір реттік капиталды қажет етеді, жылдық пайдалану шығындары шамамен 35 миллиард рубльді құрайды.

Беларустық кодтарды қолдану үшін Беларуссиялық сүт өңдеу кәсіпорындарының өндірістік желілерін техникалық қайта жарақтандыруға арналған шығындар, алдын-ала бағалау бойынша, 41,4 миллион Беларусь рублін құрайды екен.

Сонымен қатар, таңбалық кодтарды алуға және қолдануға кететін жылдық шығындар 63 миллионнан 102,4 миллионға дейінгі Беларусь рублі болады. Беларуссиялық бизнес өкілдерінің айтуынша, таңбалаудың енгізілуіне байланысты сүт өнімдерінің қымбаттауы 9% болады.

ЕАЭО Іскерлік кеңесі ЕАЭО елдерінің бизнес-қоғамдастығының қатысуымен барлық елдер үшін теңдей пайдалы болатын қағидатты ескере отырып, ЕАЭО-ға мүше мемлекеттердің таңбалауды енгізу тәсілдерін қайта қарауды сұрады. Атап айтқанда, жекелеген елдердің таңбалауды біржақты енгізу мүмкіндігі туралы ЕАЭО нормаларында сәйкестендіру арқылы тауарларды таңбалау туралы Келісімнен алып тастау және ЕЭК-ке ЕАЭО шеңберіндегі өзара саудадағы жекелеген тауарлардың таңбалануының әсерін сараптау және бағалау үшін өкілеттік беру ұсынылады.

Аталған мәселе ЕЭК кеңесінің 10 шілдедегі отырысында қарастырылатын болады, деп хабарлады Атамекен ұлттық кәсіпкерлер палатасы.