Ауыл шаруашылығы министрлігі бұқашықтар мен қошқарларды әкетуге квоталарды белгіледі

Ауыл шаруашылығы министрлігі «Қазақстан Республикасының аумағынан ауыл шаруашылығы жануарларын әкетудің кейбір мәселелері туралы» бұйрықтың жобасын дайындады, оған сәйкес бұқашықтар мен қошқарларды әкетуге квоталар енгізіледі. Құжат Ашық НҚА порталында жарияланды.

Сандық шектеулер (квоталар) алты ай мерзімге енгізіледі:

• Қазақстан аумағынан үшінші елдерге және ЕАЭО елдеріне 60 мың бұқашықтар басы мөлшерінде тірі ірі қара малды әкетуге;
• Қазақстан аумағынан үшінші елдерге және ЕАЭО елдеріне 120 мың бас қошқар мөлшерінде тірі қой мен ешкіні әкетуге.

Бұйрықпен квоталарды бөлу қағидалары бекітілді. Уәкілетті орган осы Қағидалар қолданысқа енгізілген күннен бастап үш жұмыс күнінен кешіктірмей уәкілетті органның www.gov.kz интернет-ресурсында 12 айдан асқан бұқашықтарды және 6 айдан асқан қошқарларды әкетуге квоталарды бөлудің басталғаны туралы хабарландыруды орналастырады деп хабарланады.

Бұқашықтарды әкету үшін сандық лимит 60 мың басты құрайды, оның ішінде:

• бордақылау алаңдары үшін – 30 мың бас;
• тауар өндірушілер үшін – 30 мың бас.

Қошқарларды әкету үшін сандық лимит 120 мың басты құрайды, оның ішінде:

• бордақылау алаңдары үшін – 30 мың бас;
• тауар өндірушілер үшін – 90 мың бас.

«ҚР аумағынан 12 айдан асқан бұқашықтарды әкетуге квота алу үшін бір бордақылау алаңына арналған шектеу жиынтық саны 4 мың бастан аспайды, ал бір тауар өндірушіге – 500 бастан аспайды. ҚР аумағынан 6 айдан асқан қошқарларды әкетуге квота алу үшін бір бордақылау алаңына арналған шектеу жиынтық саны 1 мың бастан аспайды, ал бір тауар өндірушіге – 500 бастан аспайды», - делінген ережеде.

Бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.