Павлодарлық фермерлерге мал жаю мәселесіне байланысты тауарлы несиелер берілуде

Аязға ауысқан еру мен жаңбыр Павлодар облысының жайылымдарында мұз тұнбасының пайда болуына әкелді. Соның салдарынан фермерлер мал бағудың мүмкін еместігіне тап болды. Мал басының азаюына жол бермеу үшін «Павлодар» ӘКК тауарлық несие ретінде жемдік астық беруді бастады. Бұл туралы облыстық ауыл шаруашылығы басқармасынан хабарлады.

Тауарлық несие кепілсіз және сыйақы (пайыз) есептелмей беріледі. Несиені 2024 жылдың 1 қарашасына дейін ақшалай қаражатпен немесе ұқсас сападағы астықтың бірдей көлемімен өтеуге болады.

Жем алу үшін негізгі талап АШЖБ (ауыл шаруашылығы жануарларын бірдейлендіру) ақпараттық базасынан үзінді көшірме, сондай-ақ шаруа және фермер қожалықтарының басшыларының нотариалды куәландырылған қайтару кепілдіктерін беруі болып табылады.

Несие алу үшін аудан әкімдіктеріне жүгіну қажет.

Айта кетейік, биылғы жылы Ақмола, Шығыс Қазақстан, Солтүстік Қазақстан облыстары мен Ұлытау облыстарының бірнеше аудандарында да жайылымдардың мұздануына ұқсас жағдай қалыптасқан.