Түркістанда үш СТФ жаңғыртуға 10,5 млрд теңге инвестиция бөлінеді

Түркістан облысында үш ірі тауарлық сүт фермасында жалпы құны 10,5 млрд теңге болатын инвестициялық жобалар іске асырылуда. Бұл туралы облыс әкімінің баспасөз қызметі хабарлады.

«Бұл жобаларды қолдауға республикалық бюджеттен жылдық 2,5% мөлшерлеме бойынша 6 млрд теңге бөлінді. Бұл «БНК АГРО KZ», «Берте Милка» және «Sultan Agro» ЖШС», - деп хабарлады әкімдікте.

Фермаларда Sezer түрік автоматты жабдықтары және швед - DeLaval орнатылады. Дания мен Венгриядан 1600 бас жоғары өнімді голштин және 600 бас симментальды аналық мал әкелінеді.

«Осы жобалар есебінен қосымша 10,4 мың тонна сүт өнімдері өндірілетін болады», - деп атап өтті әкімдікте.

Ведомствоның мәліметінше, Түркістан облысында өткен жылы 470 млрд теңгеге мал шаруашылығы өнімі өндірілген. Өндіріс көлемі бойынша өңір елімізде бірінші орында (республика бойынша үлесі 11%). Өңір үлесіне ірі қара мал басының 13%-ы, қойдың 22%-ы, жылқының 11%-ы, түйенің 15%-ы, өндірілген еттің 13%-ы, сүттің 16%-ы тиесілі.

Осы жылдың төрт айында ірі қара мал басы 1 млн 232,5 мың басқа, қой мен ешкі - 5 млн 502,4 мың басқа, жылқы - 484,8 мың басқа, түйе - 44,5 мың басқа, құс - 2 млн 085,5 мың басқа жетті, 78,4 мың тонна ет, 235,33 мың тонна сүт, 78,3 млн тауық жұмыртқасы өндірілді.

Сонымен қатар, Түркістан облысы ет экспорты бойынша республикада көш бастап тұр. Экспортталатын ІҚМ етінің 80% және ІҚМ етінің 75% облысқа тиесілі (2023 жылы 10,9 мың тонна ІҚМ еті және 5 мың тонна қой еті экспортталды).

Облыста барлығы 9183 ірі қара мал бордақылау алаңы бар. Ет өнімдерін қайта өңдеу бойынша жеті кәсіпорын (24,6 мың тонна) және сүт өнімдерін қайта өңдеу бойынша 23 кәсіпорын (143,2 мың тонна) жұмыс істейді. Осы кәсіпорындардың есебінен облыста өндірілген еттің 29%-ы және сүттің 21,5%-ы қайта өңделіп, нарыққа шығарылды.