ТМД-ның ветеринария саласындағы келісімін Мәжіліс мақұлдады

ТМД елдері жануарлардың жұқпалы ауруларының таралуымен күресуге келісті. Мәжіліс Биологиялық материал алмасу туралы келісімді ратификациялады.

Құжатқа 2022 жылғы 20 мамырда Минскіде ТМД-ның бес елі: Қазақстан, Беларусь, Қырғызстан, Ресей, Тәжікстан қол қойды.

«Келісімді ратификациялау тараптарға жануарлардың аса қауіпті ауруларының зертханалық диагностикасын жетілдіру және микроорганизмдердің (штаммдардың) ұлттық коллекцияларын толықтыру бойынша күш-жігерді біріктіруге мүмкіндік береді», - деп атап өтті Мәжілісте.

Осы зерттеулердің негізінде дәрілік препараттарды, жануарлар ауруларын диагностикалау және емдеу құралдарын әзірлеу жоспарлануда. Олар сондай-ақ тиісті мамандардың білімі мен біліктілігін арттыруға ықпал ететін болады.

Бұдан басқа, келісім шеңберінде жануарлардың жұқпалы және аса қауіпті ауруларының таралуын болдырмауға және қатысушы мемлекеттердің аумақтарын эпизоотиялардан қорғауға бағытталған алдын алу тәсілі іске асырылатын болады.