Қазақстан Иракқа 30 мың тоннаға дейін ет жеткізуге дайын
Қазақстандық ауыл шаруашылығы тауар өндірушілері Иракқа 30 мың тоннаға дейін сиыр мен қой етін жеткізуге, сондай-ақ ірі қара малдың асыл тұқымды және өнімділік сапасын арттыру үшін асыл тұқымды материал беруге дайын. Бұл туралы ауыл шаруашылығы вице-министрі Ермек Кенжеханұлы Ирактың ҚР-дағы уақытша сенімді өкілі Джабер Нажма Адбуллах Әл-Темимимен кездесуде мәлімдеді, деп хабарлады Ауыл шаруашылығы министрлігінің баспасөз қызметі.
«Ауыл шаруашылығы саласындағы ынтымақтастықтың әлеуеті зор. Біз екіжақты байланыстарды нығайтуға, сауданы дамытуға, астық, күріш, ұн, сондай-ақ мал шаруашылығы өнімдерін жеткізуді жандандыруға дайынбыз. Экспортталатын позициялардың тізімі кеңейтіліп, жеткізілім көлемі ұлғайтылуы мүмкін», - деп атап өтті вице-министр.
Өз кезегінде Джабер Нажма Абдуллах Әл-Темими бірқатар бағыттар бойынша қарым-қатынасты дамытуды ұсынды.
«Біз мелиорация, агротехника, мал шаруашылығы саласында оң тәжірибесі бар Қазақстанмен ынтымақтастыққа мүдделіміз», - деді ол.
Ермек Кенжеханұлы 2023 жылы ҚР мен Ирак арасындағы АӨК өнімінің тауар айналымы 1 млн долларды құрағанын, ал 2024 жылғы қаңтар-шілдеде - 672 мың доллар. ҚР-дан Иракқа экспорт 2024 жылғы қаңтар-шілдеде 640 мың доллардан асып кеткенін атап өтті. Негізінен Иракқа пияз, күріш, ұн, ірі қара және ұсақ мал майы экспортталады.
Кездесу соңында тараптар ауыл шаруашылығы саласындағы өзара тиімді ынтымақтастықты одан әрі нығайту туралы келісті.