Қостанай облысында қуаттылығы 50 мың тонна құс фабрикасы салынуда

Canadian Chicken Ltd. компаниясы Қостанай облысында құс етін өндіру және қайта өңдеу бойынша заманауи кәсіпорын салу бойынша ауқымды жобаны іске асыруға кірісті. Бұл туралы ҚР Ауыл шаруашылығы министрлігінің баспасөз қызметі хабарлады.

Инвестициялық жоба 2029 жылға дейін бірнеше кезеңде іске асырылатын болады. Инвестициялардың жалпы көлемі 55,4 млрд теңгені құрайды. Құс фабрикасының қуаттылығы 50 мың тонна құс етін құрайды. 500-ден астам жаңа жұмыс орны ашылады.

Ауыл шаруашылығы министрлігінің деректері бойынша қазіргі уақытта ауданы 300,5 гектар жер телімі анықталды, егжей-тегжейлі бизнес-жоспар әзірленді. Кәсіпорында әлемдегі жетекші өндірушілердің жабдықтары -MEYN, Pass Reform және BIG Dutchman орнатылады. Жобаны іске асыруға Canagrotek компаниясының құс шаруашылығы саласындағы мамандары қатысатын болады, бұл салаға озық технологиялар мен тәжірибелерді енгізуді қамтамасыз етуге мүмкіндік береді.

Canadian Chicken Ltd. құс етін, асыл тұқымды құс өсіруге, сондай-ақ етті өңдеуге және консервілеуге маманданған.