Жамбыл облысы ет өнімдерін Катарға экспорттай бастайды

Ет пен ет өнімдерін Жамбыл облысының өндірушілері Катарға экспорттай бастайды. Мұндай келісімге аймақ делегациясының Дохаға сапары барысында қол жеткізілді, деп хабарлады Ауыл шаруашылығы министрлігінің баспасөз қызметі.

Меркі ет комбинаты мен Al Dayat For Trading компаниясы Катар мемлекетіндегі ҚР елшілігінде жұмыс бағдарламасы аясында 200 тонна ет пен ет өнімдерін экспорттауға келісімшартқа қол қойды.

«Біздің өңірдің жоғары сапалы өнімі Катар нарығында үлкен сұранысқа ие болатынына сенімдіміз», - деп атап өтті Жамбыл облысы әкімінің орынбасары Әбілқайыр Тамабек.

Жамбыл ауыл шаруашылығы өндірушілері - «Сарыбас» ЖК, «Сәуле» кондитерлік фабрикасы, «Тараз халва» ЖШС, «KazirAgro» ЖШС, «БИК» ЖШС және «Ақмол» ЖШС өнімдері Доха компанияларының үлкен қызығушылығын тудырды.