Қазақстан АҚШ пен Германиядан құс өнімдерін әкелуді шектеді

Қазақстанның Ветеринариялық бақылау және қадағалау комитеті 2025 жылғы 20 қаңтардан бастап АҚШ-тың Делавэр және Оңтүстік Каролина штаттарынан және Германияның Баден-Вюртемберг жерінен құс шаруашылығы өнімдерін әкелуге және транзитке уақытша шектеулер енгізді.

Шектеулер осы аумақтарда құс тұмауының таралуына байланысты.

Шектеу алынғанға дейін әкелуге тыйым салынады:

• тірі құс және инкубациялық жұмыртқа;
• мамық пен қауырсын;
• термиялық өңдеуден (кемінде 70°С) өтпеген құс еті және құс шаруашылығы өнімдерінің барлық түрлері;
• құстарға арналған жемшөп және жемшөп қоспалары (өсімдік тектес жемшөп қоспаларын, химиялық және микробиологиялық синтезді қоспағанда);
• таксидермиялық өңдеуден өтпеген аңшылық олжалар (қауырсынды құс);
• құстарды ұстауға, союға және бөлшектеуге арналған қолданылған жабдық.

Естеріңізге сала кетейік, 14 қаңтардан бастап Қазақстанда Бранденбург жерінде аусыл ауруының өршуіне байланысты Германиядан мал әкелуге тыйым салынды.