Ауыл шаруашылығы министрлігі мал экспортына жаңа шектеулерді белгіледі

Ауыл шаруашылығы министрлігі ауыл шаруашылығы жануарларының экспортына квоталарды тағы алты айға ұзартуды жоспарлап отыр. Бұйрық жобасы қазіргі уақытта қажетті келісу рәсімдерінен өтуде.

12 айдан асқан бұқашықтарды әкету шектеуі 60 мың басты құрайды деп жоспарлануда, оның ішінде бордақылау алаңдары 40 мың басты, ал тауар өндірушілер – 20 мың басты экспортқа рұқсат алады.

4 айдан асқан қойларды әкетуге арналған шектеу 120 мың бас мөлшерінде айқындалған: бордақылау алаңдары мен тауар өндірушілер үшін 60 мыңнан.

Жобаға сәйкес, бұқашықтарды бір бордақылау алаңына әкетуге арналған шектеу оның қуатының 30%-нан аспауы тиіс. Осындай шектеулер қошқарларды экспорттау кезінде де белгіленеді.

Бұл ретте қуаттылығы 13 мың бас ІҚМ және одан да көп бордақылау алаңдары квотаның қолданылу кезеңінде 4 мың бастан аспайтын экспорттай алады. Ал қуаттылығы 5 мың бас және одан да көп ұсақ малға арналған бордақылау алаңдары ең көбі 1,5 мың бас әкетуге рұқсат алады.

Тауар өндірушілер үшін шектеулер квотаның бүкіл қолданылу кезеңіне 500 бұқа немесе 500 қошқар мөлшерінде айқындалған.

Квоталар малды үшінші елдерге және ЕАЭО елдеріне әкету кезінде қолданылатын болады. Шектеулер малдың жаппай шығарылуын болдырмау және өңдеу кәсіпорындарының жүктемесін қамтамасыз ету мақсатында енгізіледі. Квоталарды ұзарту туралы шешім 12 наурызда Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның отырысында қабылданды. Сол отырыста ВАК аналық малды әкетуге тыйым салуды ұзартты.