Қарағанды облысында тағы бір ветпункт ашылды

Қарағанды облысы Ақтоғай ауданы Нұркен ауылдық округінде ҚР агроөнеркәсіптік кешенін дамытудың 2021-2030 жылдарға арналған тұжырымдамасы шеңберінде салынған модульдік ветеринариялық пункт ашылды. Бұл бағдарлама өңірдің 12 елді мекенін қамтиды. Бұл туралы Қарағанды облысының Ветеринария басқармасынан хабарлады.

Ветеринариялық пункттің міндеттеріне ауданның эпизоотиялық салауаттылығын қамтамасыз ету мақсатында үй және ауыл шаруашылығы жануарларының профилактикасы, вакцинациясы, емдеу, сондай-ақ жоспарлы тексерулер кіреді.

Ветеринария басқармасының басшысы Амандық Жакетаев атап өткендей, қажетті жабдықтармен жабдықталған жаңа ветеринариялық пункттер ауыл тұрғындарына сапалы ветеринариялық көмек алуға және мал шаруашылығы өнімдерінің қауіпсіздігін қамтамасыз етуге мүмкіндік береді.

Өңірдің ветеринариялық станциялары үшін 2024-2025 жылдары 78 жоғары өтімді автомобиль, дәрі-дәрмектерді сақтауға арналған тоңазытқыштар сатып алынды.

Естеріңізге сала кетейік, 2024 жылы Қазақстанда 107 ветеринарлық пункт салынды, ал биыл тағы 323 нысанның құрылысын аяқтау жоспарлануда.