СҚО –дағы құс фабрикаларында жаппай қырылу тіркелмеді

Қазақстанның солтүстік аймағында жоғары патогенді құс тұмауына қарсы вакцинация құс фабрикаларынан 20 км радиуста жүргізілетін болады. Бұл туралы ҚР Ауыл шаруашылығы министрлігінің баспасөз қызметі хабарлады.

Құс тұмауы бұған дейін Солтүстік Қазақстан облысында тіркелген. 9-16 қыркүйек аралығында үй құстарының өлімі облыстың жеті ауданында болды. Сонымен қатар, Ауыл шаруашылығы министрлігінің хабарлауынша, қазіргі уақытта Солтүстік Қазақстан облысындағы құс фабрикаларында құстардың қырылу фактілері тіркелмеді.

«Құс тұмауының қоздырғышын республиканың басқа аймақтарына таратпау үшін Қазақстан Республикасы Ауыл шаруашылығы министрлігінің Ветеринариялық қадағалау және бақылау комитеті Ресей Федерациясымен шекаралас Қостанай, Солтүстік Қазақстан және Павлодар облыстарында, сондай-ақ Ақмола облысының кейбір аудандарында вакциналауды бастау туралы шешім қабылдады», - деп хабарлады баспасөз қызметі.

Сонымен бірге, құс тұмауына қарсы күрес стратегиясының шарты бойынша құс фабрикаларынан және жабайы құстардың ұшып жүрген бағыты бойынша 20 км радиуста жеке үй-жайларда құстарға вакцина егу қарастырылған. Облысқа құстарға вакцинация жүргізу үшін ҚТҚВ-ның 873 мың дозалық отандық дәрі-дәрмек бөлінген.

Сондай-ақ, облыста басқа да санитарлық шаралар кешені өткізілуде: құстардың мәйіттерін жою, үй-жайлар мен аула аумақтарды дезинфекциялау жасалуда.