Австралиядан Астанаға 300 бас ангус әуе рейсімен жеткізілді

16 қазанда Астана халықаралық әуежайына Аустралиядан 304 бас ангус тұқымды ірі қара жеткізілді. Жануарлардың жалпы салмағы 100 тоннаны құрады. Жүк рейсін Qatar Airways Cargo әуе компаниясы орындады. Бұл туралы Астана халықаралық әуежайының баспасөз қызметі хабарлады.

Аустралиядан әкелінген асыл тұқымды мал Солтүстік Қазақстан облысы Шал ақын ауданының екі фермерлік шаруашылығына жіберіледі.

«300-ден астам бас асыл тұқымды малды жеткізу халықаралық ветеринариялық-санитариялық талаптарды сақтауды, тасымалдаудың арнайы жағдайларын қамтамасыз етуді және тасымалдау процесіне қатысушылардың үйлесімді жұмысын талап еткен ауқымды логистикалық операция болды», – деп атап өтті әуежайдың баспасөз қызметі.

Әуежай өкілдері әуе айлағы қызметкерлерінің кәсіби жұмысын және барлық жауапты қызметтердің жедел үйлестіруін атап өтті. Соның арқасында әуе кемесін түсіру және жануарларды одан әрі тасымалдауға беру қажетті талаптарды сақтай отырып, тірі жүкті тасымалдауға арналған тиісті жағдайлармен қамтамасыз етілді.

Сондай-ақ баспасөз қызметі алдағы уақытта Қазақстанға ангус тұқымды асыл тұқымды мал жеткізу көлемін ұлғайтып, арнайы жүк рейстерінің жиілігін арттыру жоспарланып отырғанын хабарлады. Өз кезегінде Астана халықаралық әуежайы арнайы жүктерге қызмет көрсету мүмкіндіктерін кеңейтіп жатыр.