Қазақстанда 19 құс фабрикасын салу жоспарлануда

Қазақстанда үш жыл ішінде 285 мың тонна өнім шығаратын жаңа құс фабрикаларын ашу жоспарлануда, бұл елдің құс еті бойынша қажеттілігін толық қамтамасыз етуге мүмкіндік береді. Бұл туралы Ауыл шаруашылығы министрі Сапархан Омаров мәлімдеді.

«Қазір құс етін өндірудің көлемі ішкі нарық қажеттілігінің 58% - ын ғана өтеп отыр. Ішкі нарықты толық қамтамасыз ету үшін 171 мың тоннаға арттық өнім өндіру қажет. Бұл үшін  жаңадан құс фабрикаларын ашу керек. Сондай - ақ құс фабрикаларының қуаттылығын арттыру есебінен 2023 жылдың соңына дейін жүзеге асырылатын болады», - деді АШМ басшысы.

Мекеменің мәліметінше, құс етінің импортын қысқарту ел экономикасында жыл сайын шамамен $177 млн немесе 77 млрд теңгені сақтап қалуға мүмкіндік береді, ал қазір бұл валюта басқа елдерге кетуде.

Ол үшін ҚР - да жалпы қуаттылығы 285 мың тонна құс етін өндіретін 19 құс фабрикасын іске қосу жоспарлануда, оның ішінде биыл қуаттылығы 70 мың тонна болатын 6 құс фабрикасы, 2021-2023 жылдары қуаттылығы 215 мың тонна болатын 13 фабрика салынады.

13 инвестициялық жобаны іске асыру үшін қосымша 147 млрд теңге қажет болады, оның 69 млрд теңгесі кредиттік ресурстарды құрайды.