ІІМ: Қазақстанда мал ұрлығы 40% - ға төмендеді

Мал ұрлығына қатысты жазаны қатаң ету және қылмыстың осы түрінің алдын алу шараларын күшейту мал ұрлығы фактілерінің 40% - ға төмендеуіне ықпал етті. Бұл туралы бүгін халық алдындағы есеп берген кездесуде Ішкі істер министрі Ерлан Тұрғымбаев мәлімдеді.

«2020 жылы ел Президенті барлық құқық қорғау органдарына мал ұрлығына қарсы шараларды күшейтуді тапсырды. Қазіргі уақытта бірқатар заңнамалық іс-шаралар жасалды. Атап айтқанда, Қылмыстық кодексте мал ұрлығы үшін жаңа бап енгізілді. Қылмыстық жауапкершілік күшейтілді: жазалау мерзімі - 7 жылдан 12 жылға дейін көбейтілді, қылмыс жасаған адамның мүлкі тәркіленеді. Сондай ақ қылмыстың түрлері: топ болып қылмыс жасағандар,азаматтарға елеулі залал келтіргендер, болып бөлінеді», - деді министр.

Ол мал ұрлығы жиі кездесетін аудандардың барлық бөлімшелерінде арнайы жедел топтар құрылғанын атап өтті. Аталған бағыттағы арнайы жұмыс өткен жылдан бастап жасалуда.

Тақырыпқа байланысты оқу: Мал ұрлығы Қазақстандағы мал шаруашылығының дамуына кедергі болуда

«Қазіргі таңда мал ұрлығының саны 40% - ға азайды, ұрланған малдың 50% - ы иелеріне қайтарылды. Сонымен қатар бірқатар мәселелер де бар. Мал иелері көбінесе малдарын қараусыз қалдырады. Осыған байланысты елде малдың кесірінен жол-көлік оқиғалары да, ұрлықтар да орын алуда», - деп атап өтті Ерлан Тұрғымбаев.

Мал ұрлығын одан әрі азайту үшін қазіргі уақытта ІІМ алдын алу жұмыстарын жүргізуде. Атап айтқанда, қылмыстың осы түрінің жолын кесу бойынша жаңа технологиялар енгізілуде.

«Шаруа қожалықтарының басшыларымен, мал иелерімен бірлесіп, біз бұл жұмысты жалғастыратын боламыз. Бірақ қазірдің өзінде жақсы нәтижелерге қол жеткізудеміз», - деп түйіндеді сөзін министр.