Қазақстанда астық қоры 7,1 млн тоннаға дейін өсті

Қазақстанда 1 қыркүйектегі жағдай бойынша дәнді және бұршақты дақылдар қоры 7 млн 135,5 мың тоннаны құрады, оның ішінде бидай үлесіне 5 млн 452,4 мың тонна келеді. Бұл туралы Ұлттық статистика бюросы хабарлады.

Барлығы қыркүйек айының басында азық-түлік астығының болуы 5,9 млн тонна көлемінде, тұқым – 239,8 мың тонна және жемдік астық-964,2 мың тонна көлемінде бағаланды. Бидайға келетін болсақ, оның азық-түлік қоры 5 млн тоннаны, тұқымға-146,6 мың тоннаны және жемге -213 мың тоннаны құрады.

Бұдан басқа, қоймаларда 1,3 млн тонна арпа, 104 мың тонна сұлы, 23,9 мың тонна жүгері, 22 мың тонна күріш, 39,7 мың тонна қара бидай бар.

Барлық астық көлемінің 2,9 млн тоннасы ауыл шаруашылығы өндірушілерінің қоймаларында және 1,1 млн тоннасы шаруа қожалықтарында орналасқан. Тағы 641,8 мың тонна астық ұн тартушылар мен жарма өндірушілерде, 1,8 млн тонна – элеваторларда. Қалған астық көтерме және басқа заңды тұлғалардың үлесіне тиеді.

Қазақстанда биыл 18,3 млн тонна астық, оның ішінде 13,4 млн тонна бидай жинау жоспарланған.

Ауыл шаруашылығы министрлігінің ақпараты бойынша, 14 қыркүйектегі жағдай бойынша елімізде 11,3 млн га астық немесе жоспардың 69,8%жиналды. 12 ц/га орташа өнімділік кезінде 13,5 млн тонна астық бастырылды. 2021 жылы ұқсас күнге орташа өнімділік 8,9 ц/га құрады.

Егіннің жоғары болжамын және астықтың үлкен өтпелі қалдықтарын ескере отырып, ауыл шаруашылығы министрлігі 14 қыркүйекте бидай мен ұн экспортына шектеулерді алып тастады.