Қазақстанда арпаның бағасы бидай бағасынан жоғары

Қытайдан, Ираннан және Орталық Азия елдерінен арпаға сұраныстың жоғары болуы жемдік астықтың қазір бидайға қарағанда қымбатқа түсуіне әкелді.

Қазақстанның Астық одағының талдау комитетінің басшысы Евгений Қарабановтың мәліметінше, өткен аптада елдің ішкі нарығында 2-сыныпты арпа ҚҚС-пен (элеватордағы баға) тоннасына 77-80 мың теңге тұрды.

Арпаның экспорттық бағасы Орталық Азия үшін тоннасына 180-185 доллар (DAP Сарыағаш), Қытай үшін тоннасына 187-192 доллар (DAP Алтынкөл және DAP Достық), Иран үшін тоннасына 210-215 доллар (FOB Ақтау) болды.

Сонымен қатар, 3-сыныпты қатарлы бидай (желімшесі 23-24%) ішкі нарықта тоннасына 73-76 мың теңге (ҚҚС-пен элеватордың бағасы) болды. "Үштіктің" экспорттық бағасы тоннасына 188-194 доллар (DAP Сарыағаш) болды.

Жемдік сапалы бидайдың бағасы қымбат арпамен де байланысты: ішкі нарықта 5-сыныптың тоннасы 65-69 мың теңге, санаттан тыс бидайдың тоннасы 62-66 мың теңге тұрады.

Өз астығының қымбаттауы аясында Қазақстан Ресейде бидай сатып ала бастағаны таңқаларлық емес - импортқа тыйым салу жойылғаннан кейінгі көлемі 980 тонна болатын бірінші партия Новосібір облысынан жөнелтілді.

АҚШ биржасындағы наурыз фьючерстері жұма күні 0,84%-ға қымбаттап, бір бушель үшін 5,9 доллар (тоннасына 216 доллар) болды.