Қазақстанда өнімдерге шекті бағаларды белгілеу әдістемесі өзгереді

ҚР сауда және интеграция министрлігі әлеуметтік маңызы бар азық-түлік тауарларына шекті бөлшек сауда бағаларын және оларға шекті рұқсат етілген бөлшек сауда бағаларының мөлшерін белгілеу қағидаларына түзетулер жобасын дайындады.

Бүгінгі күні өңірлердегі бөлшек сауда бағаларының шекті мәні ресми статистикалық деректерге негізделеді. Сауда министрлігі қолданыстағы әдістемеден бас тартуды жоспарлап отыр. Ұсынылып отырған редакцияда бөлшек сауда бағаларының шекті мәндерін өңірлердің әкімдіктері белгілеуі керек:

• әлеуметтік маңызы бар азық-түлік тауарларын өндірушілердің өзіндік құны және босату бағалары;
• өндірушіден сату орнына дейінгі әлеуметтік маңызы бар азық-түлік тауарларының логистикасына арналған шығындар;
• ішкі сауданың көтерме және бөлшек сауда субъектілерінің 15%-дан аспайтын мөлшердегі сауда үстемеақылары;
• өндірушілер мен ішкі сауда субъектілерінің залалды қызметіне жол бермеу;
• сақтау шығындары.

Бұл ретте әкімдіктер азық-түлік тауарларының өңірлік өндірушілерінен, көтерме сауда субъектілерінен (өңірде өндірілмейтін тауарлар бойынша) не Өңірлік кәсіпкерлер палатасынан ағымдағы өзіндік құны және босату бағалары туралы ақпаратты ресми түрде сұратуы тиіс.

Көтерме бағаны өткізу орнына дейін жеткізуді және 15% - дан аспайтын шекті көтерме сауда үстемесін ескере отырып, өндірушінің/өнім берушінің орташа босату бағасын жиынтықтау арқылы айқындау ұсынылады. Бөлшек баға көтерме бағаны және көтерме бағадан 15% - дан аспайтын мөлшердегі шекті сауда үстемесін қосу арқылы айқындалатын болады. Бұл баға базалық бөлшек баға болып табылады.

"Тиісті тоқсанға шекті баға тарихи динамиканы, маусымдылықты және болашақта өндіріс көрсеткіштеріне әсер етуі мүмкін өзге де табиғи, техногендік және биологиялық факторларды ескере отырып, базалық бөлшек сауда бағасының өсуін/төмендеуін болжау жолымен айқындалады. Болжамдау әдістері мен тәсілдерін жергілікті атқарушы органдар дербес айқындайды", - делінген қағидалар жобасында.

Әлеуметтік маңызы бар азық-түлік тауарларына рұқсат етілген шекті бөлшек сауда бағаларының мөлшерін олардың 15% - дан аспайтын ұлғаюына жол бере отырып, белгіленген шекті мәндер деңгейінде бекіту ұсынылады.