Қызылорда облысында құрғақ түйе сүтін өндіре бастайды

Биыл Қызылорда облысында түйе сүтінен ұнтақ өндіру жұмысы басталады. Бұл туралы облыс әкімінің баспасөз қызметінен хабарлады.

«Арал ауданында «Qazaq Camel» ЖШС жылына 130 тонна түйе сүтінен жасалатын ұнтақ шығаратын зауыт салу жобасын бастады. Жобаның құны - 1,5 миллиард теңге. Кәсіпорын шамамен 150 адамды жұмыспен қамтамасыз етеді», - деді әкімдік.

Баспасөз қызметі аталған кәсіпорын бұл аймақтағы алғашқы құрғақ сүт жасайтын зауыт екенін, мамандар жаңа технологияларды игеру үшін оқудан өтетіндігін атап өтті.

Аталған зауыт құрылысының жобасы индустрияландырудың үшінші бесжылдығына енгізілген. Бағдарламаға сәйкес Арал өңірінде 2025 жылға дейін жалпы құны 551,2 млрд теңге болатын 23 жобаны жүзеге асыру жоспарланған. Нәтижесінде 6400 жаңа жұмыс орны құрылатын болады. Оның ішінде ағымдағы жылы 44,2 млрд теңгенің үш жобасын жүзеге асыру жоспарланған.

Айта кетерлік жағдай, түйе сүтінің ұнтағын шығаратын тағы бір қазақстандық EURASIA INVEST LTD компаниясы бар, аталған фирма осы аптада ҚХР-ға 3,5 тонна құрғақ түйе сүтінің ұнтағын экспорттады.