Жыл соңына дейін астық қолхаттары кепіл ретінде танылады

Фото көзі: ElDala.kz

Президенттің "Экономиканың нақты секторын несиелеуді кеңейту және халықтың несиеленуін төмендету жөніндегі шаралар туралы" Жарлығына сәйкес ағымдағы жылдың соңына дейін несиелеу мақсаттары үшін квазимемлекеттік сектор субъектілерінің кепілдігімен астық қолхаттарын қатты кепіл санатына енгізу жоспарлануда. Бұл туралы ҚР Ауыл шаруашылығы министрінің м.а. Ербол Қарашөкеев Үкімет отырысында мәлімдеді.

"Ол үшін Министрлік Қазақстан Республикасының Қаржы нарығын реттеу және дамыту агенттігімен және Ұлттық банкпен бірлесіп, астық қолхаттарын кепіл ретінде қосу критерийлері мәселесін пысықтауда", - деп атап өтті ведомство басшысы.

Ол АӨК субъектілерінің жеңілдікті қаржыландыруға қолжетімділігін арттыру мақсатында екінші деңгейдегі банктер мен микроқаржы ұйымдарына несие беруді ұлғайту, "Бәйтерек" ҰБХ" АҚ ұйымдары тарапынан Агроөнеркәсіптік кешен және тамақ өнеркәсібі салаларындағы жобаларды қоса қаржыландыру тетіктерін кеңейту бойынша жұмыс жүргізіліп жатқанын хабарлады.

"Саланы жеңілдікпен қаржыландыру көлемін ұлғайту үшін Министрлік "Бәйтерек ҰБХ" АҚ-мен бірлесіп АӨК-нің басым бағыттары бойынша инвестициялық жобаларды іске асыру мақсатында 40 млрд теңге көлемінде "Аграрлық кредиттік корпорация" АҚ бюджеттік инвестицияларды тарту бойынша жұмыс жүргізуде", - деді министрдің міндетін атқарушы.

Сонымен қатар, оның айтуынша, ауыл шаруашылығы техникасын, оның ішінде жемшөп дайындайтын техниканы және суарудың мобильді жүйелерін сатып алуды қаржыландыру үшін кейіннен лизингке беру үшін ағымдағы жылы "ҚазАгроҚаржы" АҚ жарғылық капиталын ұлғайтуға 20 млрд теңге бөлінетін болады. Жалпы, үш жыл ішінде осы мақсаттарға 79,4 млрд теңге бюджеттік инвестиция бағыттау жоспарлануда.

Сондай-ақ, ол "Ауыл аманаты" ауыл халқының табысын арттыру жөніндегі жобаны іске асыру басталғанын еске салды, оның шеңберінде сенім білдірілген өкіл (агент) арқылы 5 жылға дейін, мал шаруашылығы саласында 7 жылға дейін, жылдық 2,5% - бен шағын несиелер берілетін болады. Микронесиенің ең жоғары сомасы 8,6 млн теңгені құрайды, бұл ретте ауыл шаруашылығы кооперативтері үшін - 27,6 млн теңге.

"Жобаны іске асыруға ағымдағы жылы 17 мың микрокредит беру жоспарымен 100 млрд теңге қарастырылған, бұл 18 мыңнан астам жаңа жұмыс орнын құруға мүмкіндік береді", - деп нақтылады Қарашөкеев.

Ол отбасылық шаруашылықтарды ауыл шаруашылығы жануарларына жемшөппен қамтамасыз ету мақсатында өз мүшелеріне өзіндік құны бойынша қызмет көрсететін және оларға азық-түлікті нарықтық бағадан төмен бағамен сататын сервистік ауыл шаруашылығы кооперативтерін құру жоспарланып отырғанын атап өтті.

"Жалпы, 7 жыл ішінде жобаға 1 миллионнан астам ауыл тұрғындарын қамти отырып және оларды кооперативтік кәсіпкерлікке тарта отырып, 350 мыңға жуық жұмыс орнын құра отырып, 1 трлн теңгеге дейін бағыттау жоспарлануда", - деді министрдің міндетін атқарушы.

Қарашөкеев сондай-ақ пайдаланылмайтын ауыл шаруашылығы жерлерін алып қою жұмыстары жалғасатынын айтты. Биыл қосымша 5 млн гектар ауылшаруашылық жерлерін қайтару жоспарлануда. Бұл ретте аталған жерлер бірінші кезекте ауыл халқының мал жаю жөніндегі мұқтажын қанағаттандыру үшін бөлінетін болады.