Қарағанды облысында 1,1 млн га егіледі

Биыл Қарағанды облысында ауыл шаруашылығы дақылдарының егіс алқабы орта есеппен 43,7 мың гектарға ұлғаяды және 1 млн 105,5 мың гектарды құрайды. Өңірде дәнді дақылдарды жаппай себу мамырдың бірінші онкүндігінде басталады. Бұл туралы ElDala.kz өңір әкімінің баспасөз қызметіне сілтеме жасай отырып хабарлайды.

Қазіргі уақытта ауыл шаруашылығы техникасын жұмысқа дайындау аяқталуда. Егіс науқанына барлығы 9,5 мыңнан астам трактор, 248 егіс кешені және 4774 сепкіш тартылатын болады.

"Қазір біздің алдымызда тұрған бірінші кезектегі міндет – көктемгі дала жұмыстарын уақтылы және сапалы жүргізу. Көктемгі егісті жүргізу үшін 106,5 мың тонна дәнді дақылдар мен 42 мың тонна картоп тұқымы себілді, бұл ішкі қажеттілікті толығымен жабады. Бюджеттен 3,5 млрд теңгеден астам қаражат жоғары дәрежелі тұқымдарды, минералды тыңайтқыштар мен гербицидтерді субсидиялауға бөлінді", - деді Ауыл шаруашылығы басқармасының басшысы Асқар Санаубаров өңірдің Нұра ауданындағы агрокеңесте.

Биыл облыс бойынша 20,1 мың тонна арзандатылған дизель отыны бөлінеді. 

Естеріңізге сала кетейік, егіс жұмыстары Қазақстанның оңтүстік өңірлерінде басталған болатын. Жақын арада жұмыс республиканың басқа облыстарында басталады. Ағымдағы жылы бүкіл ел бойынша 23,4 млн га жер егу жоспарлануда. Биыл дәнді, жемшөп, көкөніс және бақша дақылдарының егіс алқаптары ұлғаяды.