Жамбыл облысы Нидерландының жылыжай бизнесіндегі тәжірибесін қабылдауда
Жамбыл облысының Нидерланды Корольдігіндегі делегациясы жылыжай бизнесінің озық технологияларымен танысты. Бұл туралы ElDala.kz өңірлік әкімдіктің баспасөз қызметіне сілтеме жасай отырып хабарлайды.
"ҚР Ауыл шаруашылығы министрлігінің қолдауымен біз Нидерланды Корольдігіне жылыжай бизнесінің дамуымен танысу үшін келдік. Бірнеше нысандарды аралап, біз жылыжай шаруашылықтарын дамыту үшін қолданылатын жаңа технологиялармен таныстық. Жамбыл облысы климаттық жағдай бойынша жылыжай шаруашылықтарын дамыту үшін барынша қолайлы. Бүгін облыс әкімінің тапсырмасы бойынша біз әріптестеріміздің тәжірибесін пайдалана отырып, осындай шаруашылықтарды салу үшін арнайы жер учаскелерін бөлдік. Біз инвесторлармен ынтымақтастық орнататынымызға сенімдімін", - деді облыс әкімінің орынбасары Қанатбек Мәдібек.
Жұмыс сапары аясында Қазақстан Республикасының Нидерланды Корольдігіндегі Төтенше және Өкілетті Елшісі Асқар Жұмағалиев пен ҚР Ауыл шаруашылығы вице-министрі Әбілқайыр Тамабектің қатысуымен шетелдік компаниялармен келіссөздер жүргізілді.
Делегация жылыжай кешендерінің 80 пайызы шоғырланған Вестланд провинциясына барып, Koppert Сress, Certhon, Tomatoworld компанияларының қызметімен танысты. Бұл жылыжай кешендерінде 1 шаршы метрден 80 келіге дейін қызанақ алынады.
Сондай-ақ, қазақстандық делегация биыл 300 компания қатысып жатқан GreenTech Amsterdam 2023 көрмесіне қатысты. Көрмеге 12 мыңға жуық адам келді.