Қазақстанда жаңбыр жауып, ауа температурасы төмендейді

21-23 шілде аралығында Қазақстанда күн күркіреп, аздап температура төмендейді. Бұл туралы Қазгидромет хабарлайды.

«Атлантикалық антициклонның таралуына байланысты синоптикалық процестердің араласуына әкеледі және бүкіл Қазақстан бойынша температураның біршама төмендеуіне әкеледі. Республиканың барлық жерінде - күн күркіреп, өткінші жаңбыр болып, бұршақ жауады», - деп хабарлайды синоптиктер.

Сонымен қатар, Қазақстан Республикасының кей жерлерінде қатты жел тұрады, оңтүстікте және оңтүстік-батыста шаңды дауыл болады.

Сондай-ақ, Қазақстанның бес аймағында 21 шілдеде дауыл тұрады деп ескерту жарияланды.

Қостанай облысында найзағай ойнайды, бұршақ жауып, солтүстік-шығыстан соққан жел екпіні 15-20, кей жерлерде секундына 23 метр болады. Күндіз оңтүстікте қатты ыстық болады, 35-38 градусқа жетеді, кей жерлерде өрт қаупі болады.

Қызылорда облысында солтүстік-батыстан жел соғады, кей аймақтарда секундына 15-20 метрге дейін жетеді. Күндіз 40-42 градусқа дейін қатты ыстық болып, төтенше өрт қаупі сақталады.

Солтүстік Қазақстан облысының кей жерлерінде найзағай ойнап, бұршақ жауады. Солтүстік-шығыстан жел соғып, секундына 15-20 метрге дейін жетеді.

Ақмола облысының кей жерлерінде найзағай ойнайды, бұршақ жауып, солтүстік-шығыстан секундына 15-20 метрге дейін жел тұрады.

Түркістан облысының тауларында найзағай жарқылдап, солтүстік-батыстан соққан  желдің екпіні секундына 15-20 метрге дейін жетеді. Күндіз облыстың басым бөлігінде қатты ыстық болып, ауа температурасы 41 градусқа жетеді, кей жерлерде төтенше өрт қаупі сақталады деп ескертті синоптиктер.