Павлодар облысында 2 мың гектардан астам жерді сумен қамтамасыз ету қалпына келтіріледі

Қазсушаруашылығы Павлодар облысының екі ауданында 2 мың гектардан астам жерді суаруға арналған  инженерлік желілерді салу және қайта құру жұмыстарын жүргізуде. Бұл туралы Экология, геология және табиғи ресурстар министрлігінің Су ресурстары комитеті хабарлады.

«Ақтоғай ауданындағы Әуелбек ауылында орналасқан «Жангөбек» ЖШС үшін 1063 гектардағы суармалы алқап үшін инженерлік желілер салынады. Сондай-ақ, жақын арада облыстың Май ауданы Майтүбек ауылында жалпы көлемі 1200 гектар болатын суармалы жердің инженерлік желілерін қалпына келтіру жұмыстары басталады», - деп хабарлады басқармадан.

Маусым айынан бері дайындық жұмыстары жасалуда. Қазіргі уақытта  Ақтоғай ауданына барлық құбырларды әкеліп, траншея салу үшін жерді қазу жұмыстары жүргізілді.

Ал Май ауданында құбырларды орнату үшін траншея салу жұмыстары аяқталды.

Комитет құрылыс кезінде еліміздегі Степногорск құбыр зауыты шығарған отандық  құбырлар - пайдаланылатындығын атап өтті.

Бұған дейін хабарланғандай, биыл Қазақстан Республикасының бес аймағында жалпы көлемі 155 мың га болатын суару жүйесін қалпына келтіру жұмыстары жүргізілуде.