Қазақстанда астық жинау жаздың ыстық болуына байланысты мерзімінен бұрын басталды
Қазақстанда жаппай егін жинау науқаны тамыздың үшінші онкүндігінде басталады, бірақ қазір көптеген өңірлерде егін жинау жұмыстары жүргізілуде. Бүгінгі таңда 1,9 млн гектар немесе жалпы аумақтың 12,5%-ы жиналды. Салыстыру үшін, өткен жылдың ұқсас күніне 1 млн га немесе 6,1% жиналды. Егін жинау науқанының ерте басталуы қалыптан тыс ыстық жаз салдарынан дақылдардың жедел пісуімен байланысты. Бұл туралы үкіметтің баспасөз қызметі хабарлады.
Күзгі егіс жұмыстары жөніндегі жедел штаб отырысында ауыл шаруашылығы вице-министрі Назгүл Хатепова биыл егін жинау алаңы 24,2 млн гектарды құрайтынын, оның 15,6 млн гектары дәнді және дәнді-бұршақты дақылдарға тиесілі екенін хабарлады. Ағымдағы күнге дәнді дақылдардың өнімділігі өткен жылмен салыстырғанда жоғары: бір жыл бұрынғы 14,8 ц/га-ға қарағанда орта есеппен 16,4 ц/га. 3,2 млн тонна астық бастырылды.
Майлы дақылдар 3,4 мың гектардан жиналды, орташа өнімділік өткен жылдың сәйкес күніне 7,4 ц/га қарсы 10,5 ц/га құрайды. 3,5 мың тонна бастырылды.
Сонымен қатар, ұйымдасқан шаруашылықтарда бір жыл бұрынғы 235,6 ц/га қарсы орташа өнімділігі 249,2 ц/га болатын 214 мың тонна картоп жиналды. Сондай-ақ 628,6 мың тонна көкөніс және 506,9 мың тонна бақша дақылдары жиналды.
Техниканың өңірлерде жаппай жинауға дайындығы шамамен 97%-ды құрайды, негізгі науқан басталғанда ол 100%-ға жетуі тиіс. Жинауға барлығы 130,8 мың трактор, 29 мың астық жинайтын комбайн, 17 мың дестелегіш және 130 мың бірлік басқа техника тартылатын болады. Басқа техникалармен қатар, жеңілдетілген лизинг бағдарламасы іске қосылғаннан бері фермерлер сатып алған 12,7 мыңнан астам трактор мен 2 340 комбайн егістікке шығады.
Аграршыларға қазірдің өзінде 1,9 млн тонна тыңайтқыш немесе жоспардың 83% жөнелтілді. Өңірлерге егін жинау жұмыстарын жүргізуге 401 мың тонна дизель отыны бөлінді. Негізгі астық егетін өңірлердің ауыл шаруашылығы өндірушілері үшін дизель отынының құны литріне 305-310 теңгені құрайды, бұл нарықтық бағадан 10%-ға төмен. Сондай-ақ, астық пен майлы дақылдарды кептіруге алдын ала 60 мың тонна сұйытылған газ бөлінген.
Штаб отырысында астық қоймаларының дайындығына ерекше назар аударылды. Жалпы сақтау қуаты 30,7 млн тонна болса, ағымдағы жүктеме 2,4 млн тоннаны (17%) құрайды. Сонымен қатар, Ақмола, Қостанай және Солтүстік Қазақстан облыстарында жалпы өңірлер бойынша қоймалардың орташа жүктемесі төмен болған кезде 40%-дан астам толтырылған жекелеген элеваторлар бар. Алдағы уақытта жаңа егіннің түсуін ескере отырып, вице-премьер - ұлттық экономика министрі Серік Жұманғарин әкімдіктерге Азық-түлік корпорациясымен бірлесіп сыйымдылықтарды босату жөніндегі жұмысты жандандыруды тапсырды.
«Агротехнологияларды сақтау нәтиже беретінін көреміз: егін жинаудың басында осындай құрғақ жазда да орташа өнімділік 16,4 ц/га құрайды, ал бұрын орташа есеппен 11-12 ц/га болған. Жаппай егін жинау науқаны кезінде уақыт қысымын болдырмау үшін астық пен майлы дақылдарды кептіру үшін газ бен дизель отынының қажетті көлемін қамтамасыз ету, жылжымалы құрамның жеткілікті мөлшері және жаңа өнім алу үшін астық сақтау сыйымдылықтарын уақтылы босату қажет», — деп атап өтті Серік Жұманғарин.
Вице-премьер сонымен қатар негізгі астық егетін өңірлер әкімдерінің орынбасарларын тыңдады. Егін жинаудың ертерек басталуына байланысты Ақмола облысы қыркүйекке жоспарланған дизель отыны көлемінің бір бөлігін тамызға ауыстыру туралы өтініш жасады. Энергетика министрлігіне бұл мәселені өңірмен жедел пысықтау тапсырылды.