QazBioPharm ауыл шаруашылығы препараттарының өндірісін ұлғайтады

QazBioPharm Ұлттық холдингі ауыл шаруашылығы препараттарының өндірісін ұлғайтады. Ауыл шаруашылығы министрлігі холдингтен 25,8 млн доза ветеринариялық препараттар мен диагностикумдар сатып алуды жоспарлап отыр. Бұл туралы Үкіметтің баспасөз қызметіне сілтеме жасай отырып, ElDala.kz хабарлайды.

QazBioPharm басшысы Ерғали Әбдірайымов мемлекеттік органдармен осы өнімді өндіруге және жеткізуге ұзақ мерзімді келісімшарттар жасасуға ниет білдірді. Мәселе мүдделі ведомстволармен қаралатын болады.

«Отандық өндірісті қолдау маңызды, бірақ ұсынылған препараттар сапа талаптарына сай болуы керек. Бұл мәселеде QazBioPharm Ұлттық холдингі тікелей жауапты. Препараттарды өндіру және жеткізу бойынша бекітілген кестені қатаң сақтау қажет», - деп атап өтті Үкімет отырысында ҚР Премьер-Министрінің орынбасары Тамара Дүйсенова.

Естеріңізге сала кетейік, қаңтар айында Парижде QazBioPharm Ұлттық холдингінің бас директоры Ерғали Әбдірайымов пен француздық Boehringer Ingelheim компаниясының президенті Кристиана Вайзен аусылға қарсы вакцина өндіру туралы келісімге қол қойды. Лицензиялық келісімге сәйкес француздық Boehringer Ingelheim Animal Health France компаниясы Дүниежүзілік жануарлар денсаулығы ұйымының стандарттары бойынша аусылға қарсы жоғары сапалы вакциналар өндірісін дамыту және оны толығымен жою мақсатында QazBioPharm үшін өз ресурстары мен тәжірибесін ұсынады.