Қазақстан ет пен астықты Тайландқа экспорттауды жоспарлап отыр

Қазақстан мен Таиланд ауыл шаруашылығы өнімдерінің өзара сауда көлемін ұлғайтуды жоспарлап отыр. Қазақстан Корольдікке ет пен астық экспорттауға дайын. Агроөнеркәсіп кешеніндегі ынтымақтастық мәселелерін Қазақстан Республикасының Ауыл шаруашылығы министрі Айдарбек Сапаров Таиланд Сыртқы істер министрінің орынбасары Джаккапонг Сангманимен кездесуінде талқылады. Бұл туралы ҚР Ауыл шаруашылығы министрлігі хабарлады.

«Қазақстанның жоғары сапалы ауыл шаруашылығы өнімдерін өндіру мен экспорттауда әлеуеті зор. Біз ет пен астық экспорты бойынша серіктестер табуға дайынбыз және олардың жоғары сапасына өзіңіз көз жеткізе аласыз. Біз сондай-ақ ынтымақтастық туралы меморандумды қарастырып, барлық егжей-тегжейлерді талқылауға дайынбыз», - деді Сапаров.

Ол Қазақстанда 180 млн га жайылымның болуы, меншікті жем-шөп және шалғайдағы мал шаруашылығының қолжетімділігі қазақстандық ет өнімдерін, оның ішінде халал талаптары бойынша өндірудің өсуіне ықпал ететінін атап өтті.

АШМ басшысы Таиландпен ауыл шаруашылығы саласындағы ынтымақтастық келешегі зор және өзара тиімді сала болып табылатынын атап өтті. 2023 жылы елдер арасындағы жалпы тауар айналымы $367 млн құрады, бұл ретте өткен жылы АӨК өнімдерінің тауар айналымы $10,8 млн құрады және өткен жылмен салыстырғанда 30%-ға аз болды (2022 жылы - $15,4 млн).

Өз кезегінде Сангмани Таиландтың ынтымақтастыққа және инвестиция көлемін ұлғайтуға дайын екенін атап өтті.

Сонымен қатар, тай тарапы қазақстандық ауыл шаруашылығы өндірушілерін мамыр айында Тайландта өтетін халықаралық сауда көрмесіне қатысуға шақырды.