Ауыл шаруашылығы министрлігінде егістікке несие беру механизмі түсіндірілді

Ағымдағы жылы егістікті несиелеуге алғаш рет 580 млрд теңгеге дейін бағытталатын болады, оның 400 млрд – коммерциялық қарыз капиталы, ол бойынша 5% жеңілдікті мөлшерлеме қолданылатын болады. Бұл туралы Ауыл шаруашылығы министрлігінде хабарлады.

«Ауыл шаруашылығы өндірушілерінің барынша кең ауқымын қаржыландыруды қамтамасыз ету, шағын және орта шаруашылықтарға баса назар аудару қажет. Премьер-министр тапсырғандай, қазір әкімдіктер Аграрлық несие корпорациясымен бірлесіп қаржыландыруға мұқтаж шаруашылықтардың тізімін пысықтауды жүргізуі қажет», - деді АШМ-де өткен кеңесте ведомство басшысы Айдарбек Сапаров.

Жаңа механизм фермерге 5% несие беруге мүмкіндік береді, ал қарыз беру мерзімі - 12 ай. Кепіл тапшылығы мәселесін шешу үшін «Даму» қорының құралдары арқылы Аграрлық несие корпорациядағы фермерлердің қарыздарына кепілдік беру тетігі іске асырылады, ол несие сомасының 85% мөлшерінде кепілдік береді. Кепіл бойынша қалған қамтамасыз етуді ауыл шаруашылығы өндірушісінің өзі береді.

АНК тарапынан қарыз мақұлданғаннан кейін ауыл шаруашылығы өндірушілері «Даму» қорына құжаттарды ұсынуы қажет. Құжаттар тізбесі Аграрлық несие корпорациясы мен «Даму» қорының сайттарында орналастырылатын болады.

Айдарбек Сапаров сондай-ақ Президенттің тыңайтқыштарды енгізу көлемін 1,5 млн тоннаға дейін ұлғайту туралы тапсырмасын еске салды, бұл Қазақстандағы егіс алқаптары үшін ұсынылған нормаға сәйкес келеді. Бұл жұмысты тездету керек.

Биылғы тәуекелдердің қатарында шегірткенің таралуы да аталды - шарықтау шегі күтілуде. Сонымен қатар, құрғақшылыққа әкелуі мүмкін қалыптан тыс жоғары температура болжанады.

«Құрғақшылық туралы болжамдарға назар аудару керек. Климаттың өзгеруіне бейімделудің жедел шаралары да, ұзақ мерзімді стратегиялары да қажет. Қажет болған жағдайда құрғақшылыққа төзімді сұрыптарға көшуді, ауыспалы егістің өзгеруін және басқа да шараларды қамтамасыз ету қажет», - деді министр.